Երբ կորոշենք, թե որ թիմի հետ ենք գնում... ԲՀԿ-ականը դեռ չի գտնում իր տեղը

Այսօր լրագրողների հետ զրույցում ԲՀԿ խմբակցության պատգամավոր Աբրահամ Մանուկյանը հերքեց բոլոր խոսակցությունները, թե ինքը կոնֆլիկտ ունի ԲՀԿ խմբակցության ղեկավար Նաիրա Զոհրաբյանի հետ: Նրա խոսքով` մանավանդ կանանց հետ ինքը կոնֆլիկտ չի ունենում:

«Ես Նաիրա Զոհրաբյանի հետ ի՞նչ պրոբլեմ կարամ ունենամ, ինքն էլ ինձ հետ չի կարա ունենա, որովհետև մենք միշտ եղել ենք փոխադարձ հասկացվածության մեջ»,- ասաց պատգամավորը:

Աբրահամ Մանուկյանը նշեց, որ մտադիր է մտնել մեծ քաղաքականություն, մնալու է քաղաքականության մեջ, պայքարելու է հանուն ժողովրդի:

Հարցին, թե ո՞ր դաշտում է իրեն հարմարավետ զգում` իշխանամե՞տ, ընդդիմադի՞ր, թե՞ այլընտրանք, Աբրահամ Մանուկյանը չկարողացավ հստակ պատասխանել: «Երբ կորոշենք թե որ թիմի հետ ենք գնում, երբ ամեն ինչ հստակ կլինի, երբ նախընտրական փուլը կսկսենք, այն ժամանակ էլ կիմանաք»,- ասաց նա:

Դիտարկմանը, որ միշտ կողմ է քվեարկում կառավարության բյուջեի նախագծերին, Աբրահամ Մանուկյանը դրական պատասխանեց` ասելով, որ նախորդ կառավարության բյուջեին ևս կողմ է քվեարկել, որովհետև ցանկանում է դրսևորվելու հնարավորություն տալ կառավարությանը: