Հավաքվենք, տեղում կորոշենք. ազատամարտիկները գաղտնի են պահում հանրահավաքի մանրամասները

Մարտի 1-ին` ժամը 13:00-ին, ազատամարտիկները կհավաքվեն Սարյան պուրակում և հանրահավաք կանցկացնեն ընդդեմ իշխանությունների վարած քաղաքականության: Այս մասին այսօր լրագրողների հետ հանդիպման ժամանակ հայտարարեցին Ազատամարտիկների ընդլայնված խորհրդի անդամները` նշելով, որ այդ հավաքը Հայաստանի գարունը հետ բերելու համար է: Նրանց հավաստիացմամբ` հանրահավաքին ներկա կլինի մոտ 3000 ազատամարտիկ:

Yerkir.am-ի հարցին` հնարավո՞ր է միանաք նույն օրը ՀԱԿ-ի կազմակերպած հանրահավաքին, ազատամարտիկ Սուրեն Սարգսյանը պատասխանեց. «Ի՞նչ ասել է ՀԱԿ-ի հանրահավաք, այդ օրը ժողովուրդն է հավաքվելու, և մենք միանալու են ժողովրդին»:

Չնայած լրագրողների հորդորին` ազատամարտիկները չմանրամասնեցին, թե մարտի 1-կին կոնկրետ ինչ են անելու: «Հավաքվենք, տեղում կորոշենք մեր անելիքները»,- ասացին նրանք:

«Կոչ ենք անում մինչ այս իշխանության հանցավոր գործունեությունը քննադատող տարբեր ուժերին` կուսակցություններին ու ՀԿ-ներին, վերջապես խոսքից գործի անցնել, ցուցադրել համաժողովրդական միասնություն և դուրս գալ հրապարակ»,- հայտարարեց Սարգսյանը:

Անդրադառնալով ԵԿՄ համագումարին` ազատամարտիկները նշեցին, որ այդ օրը երկրի նախագահը պատերազմ հայտարարեց ժողովրդին` բաժանարար գիծ գծելով իշխանության և հայ ժողովրդի միջև: Նրանց խոսքով` Սերժ Սարգսյանի ձեռամբ ԵԿՄ-ն օտարվել է հայ ժողովրդից: