ԿԲ-ն շատ թանկ համակարգիչներ է գնում, Արամյանը դա նորմալ է համարում

Այսօր ԱԺ հերթական քառօրյա նիստում քննարկվում էր 2017թ. բյուջեի նախագիծը երկրորդ ընթերցմամբ ընդունելու հարցը:

Հիմնական զեկուցող` ֆինանսների նախարար Վարդան Արամյանին հարց ուղղեց ԲՀԿ խմբակցության պատգամավոր Միքայել Մելքումյանը: Նրա` նվազագույն աշխատավարձը բարձրացնելու առաջարկը մերժվել էր: Պատգամավորը ներկայացրեց հիմքերը, թե ինչպես է հնարավոր բարձրացնել նվազագույն աշխատավարձը, ինչը կնպաստեր տնտեսական ակտիվությանը, կաճեր սպառման գործակիցը, հարկերի միջոցով հետ կգար բյուջե:

«ԿԲ-ն գրել է, թե պրեմիում դասի բենզին է նախատեսել օգտագործել: ԿԲ-ն գրել է, թե 660 հազար դրամով APPLE նոութբուք է օգտագործելու: Մտեք խանութները ու տեսեք, թե սովորական նոութբուքերն ինչ արժեն: Պարտադիր չէ, որ ԿԲ-ն օգտագործի դիզայներական լուծումներով, ռետինե էկրանով նոութբուք օգտագործի: Լուծում տվեք այս հարցերին»,- դժգոհեց պատգամավորը:

Վարդան Արամյանը, նվազագույն աշխատավարձի հետ կապված, նշեց, որ եթե արհեստականորեն փորձում ես աշխատավարձ բարձրացնել, ապա կարող ես խեղել աշխատողների շուկան: «Տեսականորեն ասում եմ, որ նվազագույն աշխատավարձը պետք է լինի ոչ թե 55 հազար, այլ 100 հազար դրամ: Դրան կարձագանքեն մնացած բոլոր աշխատողները, տնտեսվարողների մոտ սահմանային ծախսերի կորը կբարձրանա վերև, ինչը բացասաբար կանդրադառնա, որովհետև տնտեսվարողները կփորձեն ապրանքների գները բարձրացնել, ինչը հնարավոր չէ սպառման անկման պարագայում»,- ասաց նախարարը:

Ինչ վերաբերում է ԿԲ կատարած պետական գնումներին, թանկ համակարգիչներին, ապա, ըստ նրա, դա կախված է պարամետրերից, թե ինչ բարդության ծրագրեր պետք է աշխատեցնել այդ համակարգիչներով: Այսինքն` նախարարը հնարավոր համարեց, որ նման համակարգիչները կարող են թանկ արժենալ: