Սեպտեմբեր-հոկտեմբերի գյուղատնտեսական ցուցանիշները` տնտեսական աճի անկման պատճառ

ԱԺ  ֆինանսաբյուջետային հարցերի մշտական հանձնաժողովում այսօր քննարկվում էին 2016թ. բյուջեի կատարողականի առաջին ինը ամիսների արդյունքները: 

Ֆինանսների նախարար Վարդան Արամյանը նշեց, որ տնտեսական աճի ցուցանիշը կարող է կանխատեսվածից ցածր լինել գյուղատնտեսության ոլորտի անկման պատճառով, հատկապես) սեպտեմբեր, հոկտեմբեր ամիսներին ոլորտում  արձանագրվել է կտրուկ նվազում:

Լրագրողների հետ զրույցում Վարդան Արամյանը նշեց, որ ԱՎԾ-ն արձանագրել է գյուղատնտեսության ոլորտի ցուցանիշներш անկում, երկու ամիս անընդմեջ գյուղատնտեսական ոլորտն անկում է ունեցել: Դեռ պետք է ուսումնասիրություններ անեն, որ հասկանան, թե ինչ միտումներ են ազդել գյուղատնտեսության ոլորտի վրա սեպտեմբեր-հոկտեմբեր ամիսներին: Ֆինանսների նախարարությունն այդ հարցի հետ կապված հանդիպումներ է անցկացնելու ԱՎԾ-ի, գյուղնախարարության հետ: Հնարավոր է` պատճառը նախկինում տեղի ունեցած շոկերն են եղել, որոնց մասին գյուղատնտեսության նախարարությունը չի տեղեկացրել:

Մնացած ոլորտների մասով սպասումները, ըստ Արամյանի, համապատասխանում են ընթացիկ ցուցանիշներին, միայն մանրածախ առևտրի ոլորտում են արձանագրել անկում, ինչը նշանակում է, որ հանրության գնողունակությունը նվազել է:

Նշենք, որ առևտրի ոլորտում, անկումային ցուցանիշներին հակառակ, ավելանում է առևտրի հսկայական սրահների` մոլերի թիվը: