«Գարուն» ամսագիրը վերաթողարկվել է

Ամսագրի վերջին խմբագրի` Վարուժան Այվազյանի մահից հետո մտահոգություններ կային` արժե՞ նորից թողարկել «Գարուն» ամսագիրը, թե՞ ոչ: Անանյան ընտանիքի սրտացավության և հետևողականության շնորհիվ որոշվեց , որ «Գարուն» ամսագիրը պետք է հրատարակվի. լրագրողներին այսօր հայտնեց «Գարուն» ամսագրի գլխավոր խմբագիր, բանաստեղծ Աշոտ Գաբրիելյանը:

«Նոր «Գարուն»-ը փորձելու է պահպանել ավանդույթները,  նոր մոտեցումներին ընդառաջ գնալ ու մատուցել ժամանակակից ամսագիր: Կպահպանվի նաև թարգմանական ավանդույթները: «Գարուն»-ի էջերում փորձելու ենք ամփոփել ողջ գրական դաշտը: Ամեն համարի համար ունենալու ենք հստակ հարցադրում:  Փորձելու ենք քննադատության միջոցով վերհանել խնդիրներ»,-  ամսագրի կատարելիք աշխատանքները և հեռանկարները ներկայացրեց  Գաբրիելյանը:

Նա հայտնեց, որ  ամսագիրը կարելի է ձեռք բերել կրպակներից, գինը կլինի 1000 դրամ:

«Արմենպրես» պետական լրատվական գործակալության տնօրեն Արամ Անանյանն էլ ասաց, որ ամսի 4- ին կլինի «Գարուն»-ի շնորհանդեսը, իսկ մինչև տարեվերջ  լույս կտեսնի 4 համար: «Առաջին համարը նվիրված է Անկախության 25-ամյակին: Մյուս համարներում շեշտն ավելի շատ կդնենք հրապարակախոսությունների վրա: Մեր ցանկությունն այն է, որ տասնամյակներ անց, երբ «Գարուն» ընթերցեն, նույն զգացողություններն ունենան»,- հավելեց նա: