Գյուղատնտեսության նախարարը պարգեւատրել է գործարարներին

Հայաստանի Հանրապետության Անկախության 25-ամյակի առթիվ, տնտեսության զարգացման գործում ներդրած նշանակալի ավանդի համար «Մուլտի Ագրո» գիտաարտադրական կենտրոնի գլխավոր տնօրեն Ռոզա Ծառուկյանը պարգեւատրվել է ՀՀ Նախագահի Երախտագիտության մեդալով:

 ՀՀ նախագահի մեկ այլ հրամանագրով Հայաստանի Հանրապետության Անկախության 25-ամյակի առթիվ, տնտեսության զարգացման գործում ներդրած ավանդի համար Երախտագիտության մեդալով պարգեւատրվել է «Վան Արդի» ՍՊԸ-ի հիմնադիր տնօրեն Վարուժան Մուրադյանը:

ՀՀ գյուղատնտեսության նախարարությունում սեպտեմբերի 30-ին տեղի է ունեցել պարգեւատրման արարողություն, որի ընթացքում ՀՀ գյուղատնտեսության նախարար Իգնատի Առաքելյանը  գործարարներին հանձնել է ՀՀ նախագահի մեդալները:

Շնորհակալություն հայտնելով բարձր պատվի եւ պարգեւի համար` Ռոզա Ծառուկյանը նշել է, որ այն խիստ պարտավորեցնող է` հավելելով, որ այն ծրագրերը, որոնք ինքն իրականացնում է, կլինեն շարունակական:

Իր հերթին Վարուժան Մուրադյանն երախտագիտություն է հայտնել իր աշխատանքը բարձր գնահատելու համար եւ վստահեցրել է, որ կշարունակի քայլեր ձեռնարկել մեր երկրում գինեգործության մշակույթի զարգացման եւ գինեգործական ավանդույթների պահպանման ուղղությամբ: