Գյումրու և Վանաձորի ընտրական առանձնահատկությունները սահմանելու հարցը հետաձգվեց

Այսօր ԱԺ տարածքային կառավարման հարցերի մշտական հանձնաժողովի նիստում պետք է քննակվեր ՕԵԿ խմբակցության պատգամավոր Հովհաննես Մարգարյանի ներկայացրած օրենքի նախագիծը, որը սահմանում է Գյումրի եւ Վանաձոր քաղաքներում տեղական ինքնակառավարման, տարածքային կառավարման եւ տեղական ինքնակառավարման մարմինների ձեւավորման առանձնահատկությունները:

Օրենքի նախագծի ընդունումը պայմանավորված է Գյումրի եւ Վանաձոր քաղաքներում տեղական ինքնակառավարման, եւ տարածքային կառավարման մարմինների ձեւավորման առանձնահատկություններ սահմանելու հանգամանքով: Նկատի ունենալով, որ քննարկվող ընտրական օրենսգրքով առաջարկվում է Գյումրի եւ Վանաձոր քաղաքների տեղական ինքնակառավարման մարմինների ընտրություններ անցկացնել Երեւան քաղաքի տեղական ինքնակառավարման մարմինների ընտրությունների համար սահմանված կարգով, ուստի անհրաժեշտ է Գյումրի եւ Վանաձոր քաղաքների տեղական ինքնակառավարման մարմինների գործունեության եւ ձեւավորման առանձնահատկությունները սահմանել առանձին օրենքով:

Տարածքային կառավարման հարցերի հանձնաժողովի նախագահ Ստեփան Մարգարյանը նշեց, որ օրենքի նախագծի հեղինակ Հովհաննես Մարգարյանը խնդրել է հետաձգել հարցի քննարկումը, քանի որ կան խնդիրներ` հակասություններ Սահմանադրության հետ: