Մերկելը չի հրաժարվում աջակցել Բունդեսթագում Հայոց ցեղասպանության մասին բանաձևին. Reuters

Գերմանիայի կանցլեր Անգելա Մերկելը հայտարարել է, որ չի հրաժարվում Հայոց ցեղասպանության մասին Բունդեսթագի ընդունած բանաձևին աջակցելուց: Ինչպես տեղեկացնում է Reuters-ը, այդ մասին հայտարարել է քրիստոնեա-դեմոկրատների առաջնորդ Վոլկեր Կաուդերը կուսակցության անդամների հետ հանդիպման ժամանակ:

Նրա խոսքով` Մերկելն այդ մասին խոսել է իր հետ և նշել, որ ինքը բանաձևի օգտին է քվեարկել Բունդեսթագի քվեարկությունից առաջ՝ կուսակցության ժողովի ժամանակ՝ չնայած այն հանգամանքին, որ ներկա չի եղել հունիսին անցկացված քվեարկությանը:

Հիշեցնենք, որ Բունդեսթագը հունիսի 2-ին կայացած քվեարկության ժամանակ ձայների մեծամասնությամբ ընդունել է Հայոց ցեղասպանության վերաբերյալ բանաձևը, ինչից հետո Թուրքիան հետ է կանչել Գերմանիայում իր դեսպանին: Բանաձևում, որում օգտագործվում է «ցեղասպանություն» եզրույթը,  Գերմանիան պաշտոնապես ճանաչում է 101 տարի առաջ իրականացված Հայոց ցեղասպանության հարցում իր պատասխանատվությունն  ու մեղսակցությունը: