Արտոնություններ տրվեցին «Ռուսալ Արմենալ» ընկերության ներդրումային ծրագրին

Այսօր կառավարության նիստում հաստատվեց  ներդրումային ծրագրի շրջանակներում «Ռուսալ Ամենալ» ընկերության կողմից ապրանքների ներմուծման դեպքում մաքսային և հարկային մարմինների կողմից հաշվարկված ավելացված արժեքի հարկի գումարների վճարման ժամկետը երեք տարով հետաձգելու մասին հարցը:

 ՀՀ էկոնոմիկայի նախարար Արծվիկ Մինասյանի խոսքով` ընկերության  նպատակն է արտադրական հզորությունների  աստիճանական ավելացումն ու  ապրանքային արտադրանքի անվանացանկի ընդլայնումը, որի համար նախատեսում է իրականացնել շուրջ 2.4 մլրդ դրամի ներդրում, որից մոտ 816 մլն դրամը` վառարաններ ձեռք բերելու համար:

«Վերոնշյալ ներդրումների շնորհիվ հնարավոր կլինի տեղադրել լեհական արտադրության  ժամանակակից վառարաններ: Ներդրումային ծրագրի իրագործման արդյունքում կստեղծվի մինչեւ 4 աշխատատեղ`  միջին աշխատավարձը կկազմի  2016թ.- 378, 2017թ.- 389 և 2018թ.-389 հազ. դրամ»,- ասաց Արծվիկ Մինասյանը: