Վանաձորի կարի ֆաբրիկային արտոնություններ տրվեցին

Այսօր կառավարության նիստում էկոնոմիկայի նախարար Արծվիկ Մինասյանը ներկայացրեց որոշում` գերակա ոլորտում իրականացվող ներդրումային ծրագրի շրջանակներում ներմուծվող տեխնոլոգիական սարքավորումների, դրանց բաղկացուցիչ ու համալրող մասերի, հումքի և նյութերի ներմուծման մաքսատուրքից ազատման արտոնությունից օգտվելու համար «Վանաձորի «ԳԼՈՐԻԱ» կարի ֆաբրիկա» սահմանափակ պատասխանատվությամբ ընկերության կողմից ներկայացված հայտը բավարարելու մասին:

«Վանաձորի «ԳԼՈՐԻԱ» կարի ֆաբրիկա» սահմանափակ պատասխանատվությամբ ընկերությունը 2009թ.-ից գործունեություն է ծավալում Հայաստանում (Վանաձորում) և աշխատում է տոլինգային եղանակով` արտասահմանյան մի շարք ընկերությունների պատվերների հիման վրա` կարի ծառայություններ իրականացնելով մատակարարի կողմից տրամադրված հումքով և սարքավորումներով:

Ընկերությունն իր ամբողջ արտադրանքն արտահանում է եվրոպական երկրներ: Մատուցվող` կարի ծառայությունները որակի պահանջներին համապատասխանեցնելու նպատակով անհրաժեշտ սարքավորումները ներկրվել են «ժամանակավոր ներմուծում» մաքսային ռեժիմով` մեկ տարի ժամկետով, իսկ նշված ընկերությունների հետ համագործակցությունը նախատեսում է երկարաժամկետ բնույթ:

ՀՀ կառավարության կողմից երկարաձգվել է նաև ներդրումային ծրագրի շրջանակներում նշված մեքենասարքավորումների համապատասխան ռեժիմի ժամկետը: Հաշվի առնելով այն փաստը, որ Հայաստանի` ԵԱՏՄ-ին միանալու արդյունքում գործում է մաքսային ռեժիմներով ներմուծման և դրանց ժամկետների վերաբերյալ նոր ընթացակարգ, և «Վանաձորի «ԳԼՈՐԻԱ» կարի ֆաբրիկա» ՍՊԸ-ի կողմից նախկինում «ժամանակավոր ներմուծում» մաքսային ռեժիմով ներմուծված սարքավորումների նշված ռեժիմի ժամկետը ավարտվում է, անհրաժեշտություն է առաջացել վերաձևակերպել ընկերության կողմից ներմուծված սարքավորումները:

Արտոնության առկայությունը լուրջ խթան կհանդիսանա նոր ներդրումային ծրագրերի իրականացման և, որպես հետևանք, նոր աշխատատեղերի ստեղծման, ներդրումների ներգրավման, տեղական արտադրության և արտահանման խթանման համար: