Սիրիական բանակը Հալեպի հյուսիսային շրջանում առաջխաղացում է գրանցել

«Գանձասար»-ը գրում է.

«Սուրիական բանակը, ժողովրդային ինքնապաշտպանական ուժերու օժանդակութեամբ նոր յառաջխաղացք արձանագրեց Հալէպի հիւսիսային բաժինի Քասթելօ շրջանին Մէջ՝ իր հակակշռին տակ առնելով Քասթելոյի համալիրը, լողաւազանն ու Լերամունի կառատուները։

Բանակը այժմ կը տիրէ Քասթելոյի մայր ճամբուն, իր անմիջական վերահսկողութեան տակ առած է Լերամուն-Քասթելօ- Կոնտոլի շրջանցք խաչմերուկը եւ փախուստի կը մղէ Հալէպի հիւսիսային բաժնի զինեալ ահաբեկչական խմբաւորումները։

Բանակը Քասթելոյի ճամբան փակած է հողաթումբերով, այսպիսով վերացնելով Հալէպի մէջ տեղակայուած զինեալ ահաբեկչական խմբաւորումներու մատակարարման հիմնական ու միակ անցքը։

Մինչ այդ, Սուրիական Բանակի Հրամանատարութիւնը այսօր Հալէպի արեւելեան շրջանի բնակչութեան կոչ ուղղած է միանալու ազգային հաշտեցման գործընթացներուն եւ իրենց շրջաններէն վտարելու օտարազգի զինեալ ահաբեկչական խմբաւորումները, միաժամանակ ապահով անցքեր եւ ժամանակաւոր կեցութեան վայրեր ճշդելով տուեալ շրջաններէն դուրս գալ փափաքող քաղաքայիններուն համար, վստահեցնելով, որ ամէն գնով պիտի երաշխաւորէ դուրս եկող քաղաքայիններուն անվտանգութիւնն ու ապահովէ անոնց ապրուստի անհրաժեշտ պահանջները»։