Սուրիկ Խաչատրյանը չի ներկայացել իր դեմ մահափորձի գործով առաջին դատական նիստին

Երեկ Սյունիքի մարզի ընդհանուր իրավասության դատարանում (Կապանի նստավայրում) նշանակված էր Սյունիքի մարզպետ Սուրիկ Խաչատրյանի դեմ մահափորձի գործով առաջին դատական նիստը: Yerkir.am-ին հայտնի է դարձել, որ երեկվա նիստին դատարան չեն ներկայացել մեղադրող դատախազը, գործով տուժողներ Արագած Ղևոնդյանը, Սուրիկ Խաչատրյանն ու Մարտիրոս Գրիգորյանը:

Yerkir.am-ի հետ զրույցում գործով ամբաստանյալ Գարեն Աթաջանյանի պաշտպան Վահան Հովհաննիսյանը հայտնեց, որ դատախազությունը պաշտպանական կողմին չի ուղարկել մեղադրական եզրակացությունը, որպեսզի հնարավորություն ունենային ծանոթանալու և մասնակցելու դատական նիստին: Հենց այս պատճառով էլ դատական նիստը հետաձգվել է: Պաշտպանը հայտնեց, որ երեկ դատարանն է տրամադրել մեղադրական եզրակացության օրինակը:

Նշենք, որ ներկայումս այս գործով կալանքի տակ է միայն ամբաստանյալներից Հենրիկ Ավագյանը, իսկ մյուս ամբաստանյալի՝ Գարեն Աթաջանյանի նկատմամբ, որպես խափանման միջոց, ընտրվել է չհեռանալու մասին ստորագրությունը: Իսկ այս գործով արդեն նախկին մեղադրյալների ՝ Արա Բուդաղյանի և Վիտալի Մինասյանի նկատմամբ քրեական հետապնդումը ԱԱԾ-ն դադարեցրել էր` արդարացման հիմքով:

Գործով տուժող Սուրիկ Խաչատրյանը, ըստ Yerkir.am-ի տեղեկությունների, լուրջ առողջական խնդիրներ ուներ և տևական ժամանակ է` բուժում էր ստանում արտասահմանում: Մոտ մեկ շաբաթ առաջ մարզպետը Yerkir.am-ին հայտնել էր, որ կազդուրվում է և մեկ շաբաթից կվերադառնա աշխատանքի: