Խնդիրն ընդդիմությունը չէ, քաղաքացիական հասարակությունն է. Հովհաննես Սահակյան

ՀՀԿ խմբակցության պատգամավոր Հովհաննես Սահակյանը, անդրադառնալով ընտրական օրենսգրքի հետ կապված խնդիրներին, լրագրողների հետ զրույցում նշեց, որ կոնսենսուս գոյություն ունի:

«102 կողմ ձայները վկայում են կոնսենսուսի մասին, սակայն ԸՕ-ի մի քանի հարցերի շուրջ քննարկումներ կան և այս փուլում»,- ասաց նա:

Պատգամավորը չցանկացավ փակագծեր բացել և նշել, թե որ հարցերի շուրջ են քննարկումներ տեղի ունենում, բայց վստահեցրեց, որ մոտ ժամանակներում կունենան այդ հարցերի շուրջ ընդհանուր մոտեցումներ:

«Խնդիրը իշխանությունն ու ընդդիմությունը չէ, խնդիրը նաև քաղաքացիական հասարակությունն է, միջազգային այն հանրությունը, այն փորձագետները, ովքեր նաև իրենց եզրակացութունը պետք է տան, թե այդ դրույթները այս կարճ ժամանակահատվածում արդյո՞ք հնարավոր են իրագործել, թե՞ ոչ»,- ասաց Սահակյանը:

Ըստ նրա` Ընտրական օրենսգիրքը կյանքի է կոչվել և պետք է իրագործվի ամբողջ թափով ու պատրաստ լինի մինչև 2017 թվականի գարուն` համապետական ընտրությունները:

Սահակյանը նշեց, որ կուսակցություններից քննարկումներ են ունեցել միայն ՀԱԿ խմբակցության հետ, քանի որ դժգոհություններ միայն նրանք են բարձրացրել, սակայն քննարկումները հետո կլինեն 4+4+4 ձևաչափով, որում բոլոր քաղաքական ուժերն են: Պատգամավորը հավելեց, որ քննարկումներին վերջում կմասնակցի նաև քաղաքացիական հասարակությունը:

Ինչ վերաբերում է տեսախցիկների տեղադրմանը և նույնականացման քարտերով քվեարկությանը, նա ասաց, որ պատրաստ են դա իրականացնել` որոշ վերապահումներով, եթե լինեն դոնորներ և դա տեխնիկապես հնարավոր լինի այդ ժամանակահատվածի համար: