Բառը սխալ է ընտրված. Վահրամ Բաղդասարյան

Երեկ ԱԺ արտահերթ նիստի ընթացքում քվեարկության դրվեց Ընտրական օրենսգրքի նախագիծը, որը 102 կողմ, 17 դեմ և 3 ձեռնպահ ձայներով ընդունվեց: Քվեարկությունից հետո էլ ընդդիմադիր մի շարք գործիչներ շարունակեցին պնդել, որ ԸՕ-ի շուրջ կա կոնսենսուսի բացակայություն:

ՀՀԿ խմբակցության ղեկավար Վահրամ Բաղդասարյանը Yerkir.am-ի հետ զրույցում ասաց, որ ասխալմունք կա: Ըստ ՀՀԿ-ականի` «կոնսենսուս» բառը սխալ է ընտրված: «Ունեինք բավականին բացականեր և 102 կողմ ձայն: Ասեմ, որ այստեղ պարզապես բառը ճիշտ չի ընտրված, կոնսենսուս նշանակում է, որ բոլորը  միանշանակ պետք է միասնական լինեն, հակառակ դեպքում` կոնսենսուս չի լինի: Բառը սխալ է ընտրված, և ես կողմնակից եմ լայն կոնսոլիդացիային: Ես ընդունում եմ Լևոն Զուրաբյանի այն ասածը, որ տեղ կա` քննարկելու ԸՕ-ն: Քվեարկությունից հետո էլ  մեր քննարկումները կարող են շարունակվել, և ինչ-որ եզրեր գտնենք»,- ասաց Բաղդասարյանը` հավելելով, որ 102 կողմն արդեն ինչ-որ բան է ասում:

«Գիտեք, որ մեծամասնությունն ընդամենը 70 հոգի է, մենք ունեցել ենք նաև բացականեր, գումարած ՀՅԴ-ականները, ովքեր ևս ունեին բացակա.  Արմեն Ռուստամյանը գործուղման մեջ է, իսկ 102 ձայնն արդեն կոնսոլիդացիայի մասին է խոսում»,- ընդգծեց ՀՀԿ խմբակցություն ղեկավարը: