Գնումների գործընթացն ավելի թափանցիկ կդառնա

Այսօր կառավարության նիստի օրակարգին անցնելուց առաջ վարչապետ Հովիկ Աբրահամյանը խոսեց կոռուպցիայի դեմ պայքարի համատեքստում գնումների գործընթացի մասին:

«Հնարավոր կոռուպցիոն ռիսկերի նվազեցման նպատակով հանձնարարում եմ ֆինանսների նախարարությանը` առավել բարելավել գնումների գործընթացը տարբեր փուլերում` հնարավորություն ընձեռելով յուրաքանչյուր հետաքրքրվող անձի տեղեկանալու գործընթացի մասին, էլեկտրոնային գնումների կայքէջում տեսնելու հետևյալը՝ գնումների ընթացակարգի բոլոր պայմանագրերը, կնքված պայմանագրերի բոլոր արդյունքները, ընդունման-հանձնման ակտերը, հաշիվ-ապրանքագրերը և այլն»,- ասաց վարչապետը:

Շարունակելով թեման` նա նշեց, որ գնումների պաշտոնական կայքի հաշվետվությունների բաժնում ամսական կտրվածքով մանրամասն կտեղադրվի տեղեկատվություն առավել հաճախակի կատարված գնումների վերաբերյալ, օրինակ՝ վառելիքի, գրասենյակային պիտույքների գնման ընթացակարգի վերաբերյալ և այլն: Նշվելու են նվազագույն և առավելագույն գները, այդ գներից ստանդարտ շեղումը և այլն, պատվիրատուները, հաղթողի տվյալները: Ըստ վարչապետի` այս մանրամասն տեղեկատվության տեղադրումը կայքում  հանրային վերահսկողությունը  գնումների գործընթացի նկատմամբ  մեծացնելու լավ հնարավորություն է:

Վարչապետը միաժամանակ նշեց, որ չպետք է սահմանափակվել այսքանով, և հանձնարարեց ՀՀ ֆինանսների նախարարին` մշակել ծրագրային դրույթներ, որոնք հնարավորություն կընձեռեն յուրաքանչյուրին, էլեկտրոնային գնումների կայքէջում ընտրելով հետաքրքրող պարամետրերը, ինքնուրույն ձևավորել հաշվետվություններ:

«Ցանկանում եմ, որ կառավարությունն իրականացնի այս քայլերը և մեծացնի հանրության վստահությունը գնումների գործընթացի նկատմամբ»,- ասաց Հովիկ Աբրահամյանը: