Մեր տղաները կարողացել են արժանի պատասխան տալ ադրբեջանցիներին. քունկ-ֆուի ֆեդերացիայի փոխնախագահ

Համացանցում երեկվանից տեղեկություն է տարածվել, որ Ուկրաինայի Լվով քաղաքում ընթացող քունկ-ֆուի Եվրոպայի առաջնության ժամանակ ադրբեջանցի մարզիկները հարձակվել են Հայաստանի պատվիրակության անդամների վրա: Միջադեպի կապակցությամբ Yerkir.am-ը զրուցեց ֆեդերացիայի փոխնախագահ Արմեն Հարությունյանի հետ:

«Լվով քաղաքում ընթացող Եվրոպայի առաջնությունում առաջին մենամարտում Աշոտ Հարությունյանը  հաղթել է ադրբեջանցուն: Ադրբեջանական կողմը բողոքել է, սակայն մրցավարական կազմը հաստատել է մեր մարզիկի հաղթանակը: Երկրորդ մենամարտում արցախցի Դավիթ Պետրոսյանը եւս մրցել է ադրբեջանցու հետ: Մենամարտի վերջին պահին, երբ Դավիթի հաղթանակն ակնհայտ էր, Ադրբեջանի պատվիրակությունը սկսում է պրովոկացիայի գնալ.  հայհոյանքներ են տեղում մեր մարզիկների հասցեին եւ մտնում ռինգ, հարձակվում մեր մարզիկի վրա, որից հետո  Դավիթի մարզիչն է  փորձում  հանգստացնել նրանց, սակայն կրքերն ավելի են թեժանում, եւ ադրբեջանցիներն սկսում են մահակներով հարձակվել մեր հավաքականի անդամների վրա: Այնուամենայնիվ, չնայած  Ադրբեջանի պատվիրակությունն ավելի մեծ էր, մեր տղաները կարողացել են արժանի պատասխան  տալ: Բարեբախտաբար, տուժածներ չկան»,- պատմեց ֆեդերացիայի փոխնախագահ Արմեն Հարությունյանը: 

Նշենք, որ միջադեպից հետո, ըստ լուրերի, ադրբեջանական թիմը նկատողություն է ստացել ու որակազրկվել: