Ապրիլյան 4-օրյա պատերազմը` Արշակ Սիվասլյանի նկարներում

ԼՂՀ  մշակույթի և երիտասարդության պալատում բացվել է  ֆրանսահայ լուսանկարիչ Մաքս Արշակ Սիվասլյանի լուսանկարների` «Հայրեր և որդիներ» խորագրով  ցուցահանդեսը:  Հեղինակային 100  նկարների ընտրանին ներկայացնում է ղարաբաղա-ադրբեջանական պատերազմը՝ 1992 թվականի  ապրիլից մինչև 1994 թվականը, և 2016 թվականի ապրիլյան պատերազմը հավերժացրած ակնթարթներ՝ ազատագրական մարտերից և թիկունքի կյանքից:

Ցուցահանդեսը կազմակերպվել է ԼՂՀ մշակույթի և երիտասարդության հարցերի նախարարության աջակցությամբ:

***

Մաքս Արշակ Սիվասլյանը ծնվել է 1954 թվականին Ֆրանսիայի Մարսել քաղաքում:

20 տարեկանից, ֆոտոռեպորտաժներ պատրաստելու նպատակով  երկար ժամանակով մեկնել է հեռավոր երկրներ: 70-ական թվականների վերջին և 80-ական թվականների սկզբին նա հիմնականում եղել է  Հնդկաստանում, ինչպես նաև Հարավարևելյան Ասիայի երկրներում (Բիրմա, Չինաստան, Ֆիլիպիններ): Շրջագայել է նաև Ավստրալիայում, Հյուսիսային և Հարավային Ամերիկայում, Թուրքիայում, Հարավային Աֆրիկայում և շատ այլ երկրներում:

1992 թվականի ապրիլին Մաքս Արշակ Սիվասլյանը ժամանել է Արցախ՝ Ղարաբաղի դեմ Ադրբեջանի սանձազերծած  պատերազմի  ընթացքը  լուսաբանելու նպատակով: Նկարները, որոնք նա նկարահանել է հակամարտության առաջին գոտում, հրատարակվել են Nouvelle d’Armenie ամսագրում, ինչպես նաև ֆրանսիական և միջազգային մամուլում: 2001 թվականին նրա նկարները տեղ գտան «Սև այգի, պատմություն պատերազմի մասին» հրատարակչության մեջ: 1994 թվականից  առ այսօր Մաքս Սիվասլյանը հանդիսանում է  Սփյուռքում շատ հայտնի Nouvelle d’Armenie ամսագրի մշտական թղթակից:

2011  թվականին, ԼՂՀ հռչակման 20-րդ տարեդարձի կապակցությամբ, ԼՂՀ նախագահ Բակո Սահակյանի հրամանագրով, Մաքս Արշակ Սիվասլյանը պարգևատրվել է  «Երախտագիտություն» մեդալով: