Ի՞նչ ազդեցություն է թողել ապրիլյան պատերազմը ռազմական հաստատություններ ընդունելության վրա

Ապրիլյան պատերազմից հետո ՀՀ տարբեր ռազմական ուսումնական հաստատություններ դիմողների թիվը չի նվազել, գրեթե պահպանվել է նախորդ տարիների ցուցանիշը. այսօր լրագրողներին հայտնեց ՀՀ ՊՆ կադրերի և ռազմական վարչության ՀՀ և արտասահմանյան երկրների ուսումնական հաստատություններում կադրերի պատրաստման բաժնի պետ, գնդապետ Սուրեն Դավթյանը:

Նշենք, որ այս տարի ՀՀ տարբեր բուհերում ռազմամասնագիտական մասնագիտությունների գծով ուսումնառություն ստանալու նպատակով բուհեր է դիմել 118 դիմորդ, որոնցից պիտանի են ճանաչվել 83-ը:

Սուրեն Դավթյանի խոսքով՝ տարեցտարի ավելանում է պաշտպանության նախարարության պատվերով ՀՀ տարբեր ուսումնական հաստատություններում պատրաստվող մասնագետների թիվը: Ի դեպ, այս տարի Վազգեն Սարգսյանի անվան ռազմական համալսարան ընդունվել է  իգական սեռի 11 ներկայացուցիչ:

ՀՀ ՊՆ մարշալ Արմենակ Խանփերյանցի անվան ռազմական ավիացիոն համալսարանի է դիմել 160 դիմորդ, որոնց թիվը բժշկական հետազոտության արդյունքում կրճատվել է: Ուսումնարանի ուսումնական և գիտական աշխատանքների գծով պետի տեղակալ, գնդապետ Դավիթ Ալեքսանյանի խոսքով՝ այս տարի Խանփերյանցի անվան ռազմական համալսարան է դիմել  իգական սեռի 4 ներկայացուցիչ: