Պետք է ի լուր աշխարհի գովազդ անենք` ով առնում է թուրքական ապրանք, հովանավորում է ահաբեկչությունը. Թաթուլ Մանասերյան

Պետք է փորձել Թուրքիայից Հայաստան ներմուծվող ապրանքի մերժողական քաղաքականությունը հիմնավորել, նաև պետք է իմանալ, որ թուրքական ապրանքների գնմամբ ֆինանսավորում ենք այդ երկրի ռազմաարդյունաբերական համալիրը. այսօր լրագրողներին ասաց տնտեսագետ Թաթուլ Մանասերյանը:

«Պետք է ուշքի գանք, բարոյական շարժառիթն օգտագործենք և պատժամիջոցներ գործադրենք ու խզենք առևտրային հարաբերությունները Թուրքիայի հետ»,- ասաց Մանասերյանը, ապա հավելեց, որ տեղական արտադրությունը զարգացնելու ուղղությամբ պետք է աշխատել` պետություն-մասնավոր հատված-քաղաքացիական հանրություն համադրությամբ:

«Մեր երկիրը պետք է ինքնազբաղվածությանը զարկ տա, միկրոբիզնեսը ընդհանրապես չպետք է հարկվի»,- ասաց տնտեսագետը:

Դիտարկմանը, թե մեր երկրում կան նաև ռուսական արտադրության ապրանքներ, Ռուսաստանն էլ է Ադրբեջանին զենք մատակարարում, որը կիրառվում է մեր դեմ, ուրեմն պետք է ռուսական ապրանքի՞ց էլ հրաժարվենք, Մանասերյանը պատասխանեց. «Ռուսաստանի արարքն էլ անբարոյականություն եմ համարում: Ուզենք, թե չուզենք, մեր ռազմական դաշնակիցն է, իսկ Թուրքիայի պարագայում դա չի անցնում: Մենք պետք է ի լուր աշխարհի գովազդ անենք` ով առնում է թուրքական ապրանք, հովանավորում է ահաբեկչությունը: Եթե նրանք մորթում են մեր երեխաներին, մենք չենք կարող նրանց ֆինանսավորել»: