Դինքի սպանության գործով 34 կասկածյալ առաջին անգամ կկանգնեն դատարանի առաջ

Պոլսի ծանր հանցագործությունների 14-րդ դատարանում սկսվել է Հրանտ Դինքի սպանության առնչությամբ համակցված երկու դատական գործերի առաջին լսումը:

Ըստ «Ակօս»-ի՝  դատական առաջին լսումի ընթացքում առաջին անգամ 34 կասկածյալ կկանգնի դատարանի առաջ: Նրանց թվում են 26 հանրային պաշտոնյաներ:

Նիստին ներկա կլինեն նաև կասկածյալների փաստաբանները, իսկ Դինքի ընտանիքի կողմից դատարանում ներկա կլինեն փաստաբաններ Հաքան Բաքըրջըօղլուն, Սեբու Ասլանգիլն ու Բայրամ Բահրի Բելենը:

«Ակօս»-ի տեղեկացմամբ՝ այսօրվա լսումներին ներկա է նաև քրդամետ Ժողովուրդների դեմոկրատական կուսակցության հայ պատգամավոր Կարո Փայլանն ու Ժողովուրդների-հանրապետական կուսակցության նախագահի օգնական Սեզգին Թանրըքուլուն:

Նշենք, որ Օգյուն Սամասթը, Էրհան Թունջելը, Յասին Հայալը, Ահմեդ Իսքենդերը, Էրսին Յոլջուն, Թունջայ ՈՒզունդալը, Զեյնել Աբիդին Յավուզը, Օսման Հայալը նույնպես կասկածյալների թվում են։ Ինչ վերաբերում է Էնգին Դինչին, նա չի ներկայանա դատական լսումներին, քանի որ նրա նկատմամբ Թուրքիայի ՔՕ  83-րդ հոդվածով մեղադրանք է առաջադրվել:

Ի դեպ, Հրանտ Դինքի ընկերները արդարություն պահանջող պաստառներով ցույց են անում դատարանի դիմաց: