Շատ արագ, որակյալ և օպերատիվ եք աշխատում. պատգամավորը՝ Արծվիկ Մինասյանին

Այսօր ԱԺ պետա-իրավական հարցերի հանձնաժողովում քննարկվում էր կառավարության ներկայացրած օրինագիծը «Տեսչական մարմինների մասին» և «Քաղծառայության մասին» օրենքներում փոփոխություններ անելու մասին: Նշենք, որ երեկ կառավարության նիստում Հովիկ Աբրահամյանը այդ հարցն անհետաձգելի էր ճանաչել:

Հարցը ներկայացնում էր էկոնոմիկայի նախարար Արծվիկ Մինասյանը: Առաջարկվում է, որ տեսչական մարմնի ղեկավարին, որը հայեցողական պաշտոն է, նշանակի վարչապետը` Խորհրդի ներկայացմամբ: Տեսչական մարմնի անձնակազմը կազմավորում է տեսչական մարմնի ղեկավարը` իրականացնելով ինքնուրույն կադրային քաղաքականություն:

ԱԺ ԲՀԿ խմբակցության պատգամավոր Տիգրան Ուրիխանյանը դիմեց նախարարին: «Պարո\'ն Մինասյան, Դուք, ինչպես միշտ, արագ ու որակյալ աշխատում եք: Կառավարության վերջին հարցուպատասխանի օրվանից օրեր են անցել, ու շատ արագ, որակյալ և օպերատիվ աշխատեցիք, շնորհակալ եմ»,- ասաց նա:

«Առիթ կունենանք տեսչական բարեփոխումների հայեցակարգի վերաբերյալ միասին աշխատել, որովհետև սա երկրում հիմնարար փոփոխություններից մեկն է լինելու, և կարևոր է, որ համախոհությամբ այդ փոփոխությունը կատարենք` ունենալով նորմալ, որակյալ պետական վերահսկողական համակարգ»,- ասաց Արծվիկ Մինասյանը,  նաև շնորհավորեց Ուրիխանյանին առաջնեկի ծննդյան կապակցությամբ:

Հարակից զեկուցող Տիգրան Ուրիխանյանը իր ելույթում ասաց. «Հույս ունեմ, որ Դուք` պարո\'ն Մինասյան, հնարավորինս երկար կպաշտոնավարեք, որովհետև կարևոր փոփոխություններ եք ձեռնարկում»: