Բրյուսելն անտեսեց Անկարայի նախազգուշացումները. Էրդողան

Թուրքիայի նախագահ Ռեջեփ Թայիփ Էրդողանը հայտարարել է, որ Բելգիայի մայրաքաղաք Բրյուսելում մարտի 22-ին ահաբեկչություններ իրականացրած Խալիդ և Իբրահիմ էլ Բաքրաուի եղբայրներից մեկն անցած տարի ձերբակալվել էր Թուրքիայում:

Ըստ AA-ի՝ Էրդողանը հայտնել է, որ  իրենք ձերբակալվածին Նիդեռլանդներին են հանձնել և նրա արտաքսումից հետո համապատասխան նախազգուշացումներ ուղարկել Բելգիայի ու Նիդեռլանդների իշխանություններին:

«Բրյուսելն անտեսեց Անկարայի նախազգուշացումները նրա՝ ահաբեկիչ լինելու վերաբերյալ»,- նշել է նա:

Էրդողանը դժգոհել է նաև այն իրավիճակից, որ մի շարք երկրներ Բրյուսելի զոհերի հիշատակին իջեցրել են երկրի դրոշները, սակայն «անտեսել Թուրքիայում մեկ ամսում տեղի ունեցած երկու խոշոր ահաբեկչությունները»:

«Աշխարհի տարբեր երկրներին ոտքի հանողները նույն նրբանկատությունը չցուցաբերեցին Թուրքիայի դեպքում, թեև այդ ահաբեկչությունների ընթացքում համեմատաբար ավելի շատ զոհեր են գրանցվել: Ավելին՝ այդ պահին ընթացող գործողությունների վերաբերյալ մեզ խորհուրդ տվողներ կան: Արդյոք կարո՞ղ է լինել մի երկիր, ուր ահաբեկչություններ են տեղի ունենում, սակայն տեղի չեն ունենում դրանց հակադարձող գործողություններ: Աշխարհի բոլոր երկրներում էլ նման գործողություններ լինում են»,- հայտարարել է Էրդողանը՝ ակնարկելով երկրի արևմտյան հատվածում հակաքրդական գործողությունները: