Միշտ պատրաստ եմ իմ հետեւից տանել թիմին. Հենրիխ Մխիթարյան

 Ֆուտբոլի Հայաստանի հավաքականն այսօր բաց մարզում անցկացրեց ավանի ակադեմիայում, որից հետո լրագրողների հարցերին պատասխանեց կիսապաշտպան Հենրիխ Մխիթարյանը: «Լավ մարզում անցկացրեցինք, եւ հույս ունենք որ լավ կնախապատրաստվենք Բելառուսի հետ խաղին: Հավաքականի նորեկները լավ տպավորություն թողեցին: Պետք է փորձենք օգնել նրանց, որպեսզի մերվեն թիմին»,-ասաց Մխիթարյանը:

Խոսելով թիմի ավագ Ռոման Բերեզովսկու հեռանալու եւ Բելառուսի հետ խաղի մասին՝ Մխիթարյանն ասաց. «Ոչ մի նշանակություն չունի թիմի ավագը ես կլինեմ, թե մեկ ուրիշը: Միշտ պատրաստ եմ իմ հետեւից տանել թիմին: Չեմ կարող ասել, թե ինչ մարտավարությամբ ենք խաղալու Բելառուսի դեմ, որովհետև այդ հարցը գլխավոր մարզիչը քննարկում է մարզչական շտաբի հետ: Մենք պետք է փորձենք իրագործել այն, ինչ կհանձնարարի մարզիչը»:

Հայ ֆուտբոլիստն անդրադարձավ նաեւ պաշտպան Ռոբերտ Արզումանյանի ՝ հավաքականում կարիերան ավարտելու որոշմանը. «Կարող եմ միայն հարգել Ռոբերտի որոշումը: Միայն շնորհակալություն եմ հայտնում նրան այսքան տարի հավաքականի հետ լինելու համար: Ճիշտ է` ցավալի է, բայց պետք է առաջ շարժվենք եւ մտածենք, թե ինչպես կարելի է փոխարինել իրեն»: