Ուշադրություն` ցրտահարության վտանգ կա. ամենախոցելին ծիրանենին է

Առաջիկա օրերին հնարավոր է ցրտահարություն, քանի որ հանրապետություն է ներթափանցել սառը օդային ցիկլոն. այսօր լրագրողներին հայտնեց ՀՀ գյուղատնտեսության նախարարի տեղակալ Գառնիկ Պետրոսյանը:

Ըստ նրա` հույս կա, որ դեղձենին և այլ կորիզավորներ շատ չեն տուժի, բայց ամենախոցելին ծիրանենին է, և անհանգստությունը հենց ծիրանենու հետ է կապված:

Պետրոսյանը նշեց, որ պետք է համապատասխան միջոցառումներ իրականացնել, որպեսզի ծաղկած ծառերը հանկարծ չցրտահարվեն:

«Առաջիկա երեք օրերին գիշերն անհրաժեշտ է ծխեցում կատարել. տասնյակ ծխակույտեր են պետք, և լավ կլինի, որ գյուղացիները միասին աշխատեն, քանի որ միայնակ դժվար կլինի: Ծխատուփերի կիրառումը ևս արդյունավետ կլինի, իսկ ծխահարում պետք է կատարել գիշերը, երբ ջերմաստիճանը մոտենա արդեն բացասականին»,- ասաց նա:

Պետրոսյանը տեղեկացրեց նաև, որ այս օրերին գործելու է գյուղատնտեսության նախարարության թեժ գիծը` 055 54 19 68 հեռախոսահամարով, և բոլոր հարցերի դեպքում կարող են դիմել իրենց: