Թուրքիային հրահանգներ տալու` ձեր ժամանակները վաղուց անցել են. Էրդողանի խոսնակը՝ ԱՄՆ դեսպաններին

Թուրքիայի նախագահի խոսնակ Իբրահիմ Քալընը հակադարձել է Անկարայում ԱՄՆ երկու նախկին դեսպաններ Մորթոն Աբրամովիչի և Էրիկ Էդելմանի դիտարկմանը: Նրանք հիմա ղեկավարում են Bipartisan Policy Center ռազմավարական կառույցի «Թուրքիայի նախաձեռնություն» խումբը. տեղեկացնում է Ermenihaber-ը:

Նախկին դեսպանները Washington Post թերթում հրապարակել էին համատեղ հոդված, որում գրել էին, որ, հանուն Թուրքիայի կայունության և ժողովրդավարության, նախագահ Էրդողանը կա\'մ պիտի փոխվի, կա\'մ հրաժարական տա:

Էրդողանի խոսնակը, ի պատասխան, Twitter-ում կատարել է հետևյալ գրառումը. «Իրենք իրենց գաղութարարներ երևակայող երկու նախկին դեսպանները գրել են, թե Էրդողանը թող հրաժարական տա: Թուրքիային հրահանգներ տալու` ձեր ժամանակները վաղուց անցել են, պարոնա\'յք»: