Բոլորս էլ ունեցել ենք ավարտական երեկո, բայց այն չպետք է շքեղության ցուցահանդես դառնա

Եթե երեխան ծաղկեփունջ է տալիս կամ ինքն իր ձեռքով մի փոքր նվեր է պատրաստել, ընդունելի է, բայց եթե ծնողական կոմիտեն դրամ է հավաքում կամ դրամ է տալիս ուսուցչին, չի կարելի, չի կարելի նվերը տալ դրամի տեսքով. այսօր լրագրողներին ասաց ԿԳ նախարար Լևոն Մկրտչյանը:

Նա նշեց, որ առաջիկա օրերին հատուկ շրջաբերական կլինի և կդրվի պահանջ` ծնողներին չդնել լրացուցիչ բեռի տակ` տետրերի կամ այլ հարցերի համար գումար հավաքելու առումով: «Բոլորս էլ ավարտական երեկո ունեցել ենք, բայց եթե այն դառնում է շքեղության ցուցահանդես, ուրեմն տնօրենն իր տեղում չէ, չպետք է դա թույլ տա»,- ասաց ԿԳ նախարարը:

Նա նշեց նաև, որ նախարարությունում ստեղծված է հակակոռուպցիոն հանձնաժողով, որի առաջին նիստը նախատեսվում է գումարել վաղը: «Մեկ-երկու ուսուցիչ պատժելով կամ մեկ-երկու տնօրեն հեռացելով՝ հարցը չի լուծվի: Կարևորը հասկանալն է, թե պատճառները որտեղից են գալիս և հետո նոր միայն դրանց լուծման ուղղությամբ ծրագրեր մշակել»,- ասաց Մկրտչյանը: