Միշտ չէ, որ մեզ զենք են վաճառելու, երկրի ապագան բնագիտության զարգացման մեջ է

Բուհերում կան ֆակուլտետներ, որոնք քիչ են համալրվում, և ՀՀ ԿԳ նախարար Լևոն Մկրտչյանն այսօր լրագրողներին մտահոգություն հայտնեց, որ դրանք կդասվեն աստիճանաբար վերացող ֆակուլտետների շարքը: 

Նա նշեց, որ այսօր, ցավոք, նման վիճակում է քիմիայի ուղղությունը: Մկրտչյանի հավաստմամբ` իր հիմնական նպատակը հարցի պատասխանը որոնելն է, թե մեզ` որպես երկիր, որը գտնվում է բարդ աշխարհաքաղաքական վիճակում, որը երկու կողմից ունի թշնամիներ, շրջափակման մեջ է, «Քիմիա» գիտությունն արդյո՞ք հարկավոր չէ:

«Միշտ չէ, որ մեզ զենք են վաճառելու, մենք պետք է մեր առաջնահերթությունները ճշտենք: Ես պատմաբան եմ, բայց, իմ խորին համոզմամբ, մեր երկրի ապագան բնագիտության զարգացման մեջ է: Պետք է աշխատատեղեր ստեղծել համապատասխան ուղղություններով, օրինակ` երկրաբանությունը քիչ-քիչ սկսեց ոտքի կանգնել: Եթե անգամ աշխատատեղեր էլ չկան, պարտավոր ենք պահել գիտությունը` հանուն գիտության, քանի որ կորցրած արժեքները հետո չենք կարողանալու վերականգնել»,- ասաց նախարարը: