ԱԺ էթիկայի հանձնաժողովը ուրիշի փոխարեն քվեարկությունը ճանաչել է կանոնակարգի խախտում

Ազգային ժողովի էթիկայի ժամանակավոր հանձնաժողովը կանոնակարգի և էթիկայի խախտում է որակել 7 պատգամավորների՝ ուրիշի փոխարեն քվեարկելու քայլը: Հանձնաժողովը փետրվարի 18-ին դռնփակ նիստ է գումարել, որի ընթացքում քննարկվել է լրագրող Լիլիթ Լալայանի դիմումը: Այդ մասին ԱԺ-ում լրագրողներին հայտնել է էթիկայի հանձնաժողովի նախագահ Խոսրով Հարությունյանը:

 Խոսրով Հարությունյանը հայտնել է, որ իրենք Ազգային ժողովի նախագահ Գալուստ Սահակյանին առաջարկելու են  առաջիկա քառօրյա նիստերի օրակարգում ընդգրկել օրենքի նախագիծը, որը վերաբերում է ուրիշի փոխարեն քվեարկելու դեպքերը կարգազանցություն որակելուն: 

 «Այդ նախագիծն, ի դեպ, առաջին ընթերցմամբ արդեն իսկ ընդունվել է: Հիմա մենք առաջարկել ենք այն պարտադիր քննարկման դնել և ընդունել երկրորդ ընթերցմամբ: Նման դեպքերի համար պետք է կիրառել խիստ պատժամիջոց»,- ասել է Հարությունյանը:

Հիշեցնենք, որ լրագրող Լիլիթ Լալայանի դիմումի ու ներկայացրած փաստերի համաձայն ուրիշի փոխարեն քվեարկել են ՀՀԿ-ական պատգամավորներ Սպարտակ Մելիքյանը, Համլետ Հարությունյանը, Կարեն Սարիբեկյանը, Սեյրան Սարոյանը, Առաքել Մովսիսյանը, Արշակ Մխիթարյանը, եւ  ԲՀԿ-ական` Բազմասեր Առաքելյանը