Էթիկայի հանձնաժողովը կարճել է Նիկոլ Փաշինյանի դիմումի հիմքով գործը

ԱԺ էթիկայի հանձնաժողովն այսօր քննարկել է պատգամավոր Նիկոլ Փաշինյանի դիմումի հետ կապված հարցը և որոշել կարճել դրա վարույթը: ԱԺ պատգամավոր Նիկոլ Փաշինյանը հանձնաժողովին ուղղված դիմումում, մասնավորապես, տեղեկացրել է, որ «Հայկական ժամանակ» օրաթերթի խմբագրությունից ստացել է գրություն, որով իրեն առաջարկվում է գլխավորել օրաթերթի խմբագրական խորհուրդը:

ԱԺ էթիկայի հարցերով մշտական հանձնաժողովի նախագահ Հովհաննես Սահակյանը լրագրողներին ասել է, որ, ԱԺ կանոնակարգ-օրենքի համաձայն, պատգամավորը եզրակացություն է ներկայացնում նրա նշած աշխատանքը, «Հանրային ծառայության մասին» Հայաստանի Հանրապետության օրենքի 24-րդ հոդվածի համաձայն, գիտական, մանկավարժական կամ ստեղծագործական աշխատանք համարելու վերաբերյալ, սակայն դա վերաբերում է այն դեպքերին, երբ խոսքը վճարովի աշխատանքի մասին է, մինչդեռ Ն.Փաշինյանը դիմել է անվճար հիմունքներով աշխատանքի վերաբերյալ եզրակացություն ստանալու համար, այդ իսկ պատճառով դիմումի վարույթը կարճվել է: