Թուրքիայում հայաստանցի լինելն այսուհետ ավելի դժվար է. «Ակօս»

Կ.Պոլսում տարեց հայ ամուսինների կողոպուտից հետո հայացքները դարձյալ շրջվեցին դեպի հայաստանցի փախստականների կողմը: «Ակօս»-ը հայաստանցիների մասին զրուցել է Թուրքիայում նրանց հարցերով զբաղվող սոցիոլոգ Լուլուֆեր Քյորուքմեզի և Թուրքիայում հայ համայնքի առաջատար ներկայացուցիչների հետ:

«Հայաստանցի փախստականները, բացի անկանոն փախստական լինելու դժվարություններից, ստիպված են առերեսվել և գլուխ հանել Թուրքիայում հայաստանցի լինելու փաստի առաջացրած խնդիրներից»,- նշել է Քյորուքմեզը:

«Ակօս»-ի հետ զրույցում Թուրքիայում ապրող հայաստանցիները իրենց խոր ցավն են հայտնել տարեց հայ ամուսինների հետ կատարվածի կապակցությամբ: Ըստ կայքի՝ թուրքահայերի հետ խնդիրներից բացի, նրանք պայքարում են Թուրքիայում հայ լինելու պատճառով առաջացած դժվարությունների դեմ:

Կայքը հայտնում է, որ Թուրքիայում հայ համայնքը փորձում է լուծում տալ հայաստանցիների խնդիրներին:

Հիշեցնենք, որ փետրվարի 6-ին Կ.Պոլսի Շիշլի թաղամասում մի խումբ ավազակներ թալանելու նպատակով մտել էին տարեց հայ զույգի տուն, կողոպուտից հետո զույգին կապկպել էին ու հեռացել: Արդյունքում` 87-ամյա ամուսինը խեղդվել էր, իսկ 79-ամյա կինը ծանր վիճակում տեղափոխվել հիվանդանոց: Հետագայում  ՀՀ ԱԳՆ-ը հաստատել էր տեղեկությունները, որ հայ ընտանիքի վրա հարձակման գործով ձերբակալվածների թվում կան ՀՀ քաղաքացիներ:

Թարգմանությունը՝ Արազ Գայմագամյանի