Պատճառը հայերեն էջե՞րն են. Թուրքիայում հայ պատգամավորը բարձրացրել է բանտում «Ակօս»-ի տարածումը խոչընդոտելու հարցը

Տեղեկացրել ենք, որ թուրք իրավապաշտպան Օզլեմ Դալքըրանը բանտում չի կարողացել ստանալ Ստամբուլի հայկական «Ակօս» թերթը՝ պատճառաբանությամբ, թե այն ունի նաև հայերեն էջեր:

Թուրքիայում ընդդիմադիր Ժողովրդահանրապետական կուսակցության հայ պատգամավոր Սելինա Դողանը խորհրդարանում բարձրացրել է այդ հարցը:

Ըստ «Ակօս»-ի՝ պատգամավորը պաշտոնական հարցում է հղել Թուրքիայի արդարադատության նախարար Աբդուլհամիդ Գյուլին: Նա խնդրել է բացատրել, թե ի՞նչ պատճառաբանությամբ և ի՞նչ օրենքով է կալանավորված իրավապաշտպանը զրկվում հայկական թերթ ստանալու իրավունքից:

«Պատճառաբանությունն ինչ ուզում է լինի, Օզլեմ Դալքըրանին «Ակօս» թերթից զրկելը որևէ արդարացում չի կարող ունենալ: Նամանավանդ՝ շատ լուրջ հետևանքներ կարող է ունենալ դա, եթե այդ պատճառաբանությունը պարբերականի՝ հայերեն էջեր ունենալն է: Միջազգային համաձայնագրերով հատուկ պաշտպանության տակ առնված լեզուն սահմանափակել փորձելու այս միտումը որքան կամայական է, այնքան էլ անօրինական, տգետ և անընդունելի»,- ասել է Դողանը: