Ես ինձ ավելի հանգիստ եմ զգում փոթորկի մեջ. Փոստանջյան

Այսօր ԱԺ պետաիրավական հարցերի մշտական հանձնաժողովում քննարկվում էր ՄԻՊ պաշտոնում թեկնածուի ընտրության հարցը: Երբ քննարկվում էր Զարուհի Փոստանջյանի թեկնածությունը, ԱԺ ՀՀԿ խմբակցության պատգամավոր Լևոն Մարտիրոսյանը հարց ուղղեց նրան` նախ կարծիք հայտնելով, որ Զարուհի Փոստանջյանն իրեն աշխատանք է փնտրում՝ հավակնելով ՄԻՊ պաշտոնին:

«Դուք հո գիտեք, որ չեք ընտրվելու` որպես ՄԻՊ, զուտ քաղաքական մեծամասնության ձայների պատճառով: Խնդրում եմ պարզաբանեք,` ինչո՞ւ եք առաջադրվում ՄԻՊ պաշտոնում»,- հարցրեց Լևոն Մարտիրոսյանը:

Զարուհի Փոստանջյանն էլ պատասխանեց, որ ինքն ավելի հանգիստ է իրեն զգում փոթորկի մեջ, և որ իր առաքելությունը պայքարելն է: «Պայքարն ինձ համար ավելի գերադասելի է, քան ինչ-որ աշխատանք ունենալը»,- ասաց նա:

ՀՅԴ խմբակցության պատգամավոր  Արծվիկ Մինասյանը արձագանքեց` ասելով. «Տիկի\'ն Փոստանջյան, ասեք` լավ է լինել կատվի գլուխ, քան առյուծի պոչ»:

Հանձնաժողովի նախագահ Հովհաննես Սահակյանը նշեց, որ ուզում է լսել ՄԻՊ պաշտոնի թեկնածու Զարուհի Փոստանջյանի ծրագրային ելույթը, ոչ թե քաղաքական մեկնաբանություններ` Լիսկայի կամ մյուսների մասին:

«Դուք կարող է շատ բան եք ուզում»,- Հովհաննես Սահակյանին արձագանքեց Զարուհի Փոստանջյանը: