Դուք ուզում եք, որ ես խոստովանություննե՞ր անեմ. Արմեն Աշոտյան

ԿԳ նախարար Արմեն Աշոտյանն այսօր խորհրդարանում լրագրողների հետ զրուցելիս անդրադարձավ մամուլում հրապարակված այն լուրերին, համաձայն որոնց` առաջիկայում ԿԳ պորտֆելը կհանձնվի ՀՅԴ-ին: Նա նշեց, որ չի մեկնաբանում այն տեղեկությունները, որոնք հրապարակված են մամուլում, քանի որ «նշանակում է մամուլը, հաստատում է մամուլը»:

Դիտարկմանը` լուրեր կան, որ Ձեզ առաջիկայում հնարավոր է նշանակեն դեսպանի պաշտոնում, Աշոտյանը պատասխանեց. «Դուք ուզում եք, որ ես խոստովանություննե՞ր անեմ»:

Դիտարկմանը, թե ՀՅԴ-ն տարիներ շարունակ կրթության ոլորտն է ղեկավարել, նախարարն արձագանքեց, որ քաղաքականությունը ոլորտային է, իհարկե, կախված է նաև նրանից, թե որ քաղաքական ուժի ներկայացուցիչն է տվյալ պահին ղեկավարում, բայց ընդհանուր գերակայությունները նույնն են:

«Սա նշանակում է, որ կրթական ոլորտի ռազմավարությունը վերջին 25 տարիների ընթացքում եղել է նույնը: Հետևաբար, նախարարների փոփոխությունները բերել են բացառապես տակտիկական փոփոխությունների: Այսինքն՝ ոլորտային տեսանկյունից է փոփոխությունը, իսկ քաղաքականությունը անշեղորեն է»,- ասաց Աշոտյանը:

Հարցին` ՀՀԿ-ն հեղիանակազրկվա՞ծ է, պատասխանեց, որ հպարտությամբ է կրում կուսակցության անդամ լինելու առաքելությունը, ինչպես նաև կրծքանշանը:

Պատասխանելով հարցին, թե ԵՏՄ վարչապետ Տիգրան Սարգսյանից ի՞նչ ակնկալիքներ ունի, Աշոտյանը նշեց, որ կարծում է՝ Տիգրան Սարգսյանը պատվով կներկայացնի երկիրը՝ որպես հմուտ տնտեսագետ: