80 միլիարդ դրամով պակաս են հարկեր հավաքել 2015-ին. փոխնախարար

Այսօր կառավարության նիստից հետո ՀՀ ֆինանսների նախարարի տեղակալ Պավել Սաֆարյանն անդրադարձել է մի քանի հարցերի: Նրա խոսքով` երբ 2015 թվականի պետական բյուջեի հարկային եկամուտների պլանը թերակատարվեց, դա ՀՆԱ-ի նախատեսված ցուցանիշից ավելի ցածր ցուցանիշներ ունենալու պատճառով էր: Սակայն, փոխնախարարի խոսքով, չնայած հարկերի թերակատարմանը,  կառավարությանը հաջողվեց ամբողջ ծախսային պարտավորությունները կատարել և որևէ ծախսային պարտավորություն չի եղել, որ չի կատարվել: Սաֆարյանի հավաստմամբ` կառավարությունը ծախսային հատվածում թերացումներ չի ունեցել վարկերի շնորհիվ. «Վարկերի և, իհարկե, ծախսերի ավելի օպտիմալ կատարման հաշվին: Բացի վարկերից, որը լրացուցիչ աղբյուր հանդիսացավ այդ ծախսերը կատարելու համար, եղան նաև որոշակի ծախսեր, որոնք չկատարվեցին, դրանք ո՛չ աշխատավարձային, ո՛չ սոցիալական ծախսեր էին»: Նա տեղեկացրեց, որ մոտավորապես 80 միլիարդի հարկեր չեն հավաքագրվել. «Սակայն մենք ստացանք մոտ 48 միլիարդ վարկ, մենք ստացանք լրացուցիչ եկամուտներ` 4 միլիարդ»,-ասաց Սաֆարյանը: