Մեկ շաբաթ առաջ վրաերթի ենթարկված 14-ամյա աղջկա վիճակը ծայրահեղ ծանր է

Տեղեկացրել ենք, որ հունվարի 11-ին  անհայտ մակնիշի և համարանիշով ավտոմեքենայի վարորդը Բագրատունյաց փողոցում` Երևանյան լճի կամրջին, վրաերթի է ենթարկել հետիոտն` Արմավիր քաղաքի բնակիչ, 14-ամյա Շուշանիկ Իսպիրյանին: Վարորդը, երեխային թողնելով անօգնական, դեպքի վայրից դիմել է փախուստի: Վրաերթի ենթարկվածը ծայրահեղ ծանր վիճակում տեղափոխվել է «Սուրբ Աստվածամայր» բժշկական կենտրոն:

Հիվանդանոցի մանկական վերակենդանացման բաժնից yerkir.am-ին տեղեկացրին, որ աղջկա վիճակը շարունակում է մնալ ծայրահեղ ծանր. աղջիկը դեռ գիտակցության չի եկել.«Միացված է արհեստական շնչառության սարքին: Ցավոք, նրա առողջական վիճակում որևէ դրական փոփոխություն չկա»:

Հիշեցնենք, որ հիվանդանոցի տնօրեն Նիկոլայ Դալլաքյանը տեղեկացրել էր, որ աղջիկն ուղեղի ծանր վնասվածքներ է ստացել, նրան վիրահատել էին, ներգանգային տվիչ տեղադրել: