Քասախի կիրճում հայտնաբերված 23-ամյա աղջկա վիճակը ծայրահեղ ծանր է

Տեղեկացրել էինք, որ երեկ գիշերը` ժամը 03:00-ին, փրկարարները Արագածոտնի մարզի Աշտարակ քաղաքի Քասախի կիրճում ընկած  23-ամյա աղջկա են հայտնաբերել: Աղջիկը նախ հոսպիտալացվել էր Աշտարակի բուժկենտրոն, այնուհետև տեղափոխվել Երևան՝ «Արմենիա» բուժկենտրոն:

«Արմենիա» հիվանդանոցի վերակենդանացման բաժանմունքի վարիչ Սուրեն Մակարյանը  Yerkir.am-ի հետ զրույցում նշեց, որ աղջիկը երեկվանից դեռ գիտակցության չի եկել: «Նա վերակենդանացման բաժանմունքում է, բազմաթիվ կոտրվածքներ ունի վերջույթների, ինչպես նաև գլխի շրջանում: Վիճակը ծայրահեղ ծանր է»,- հայտնեց նա:

Նշենք, որ դեպքի մանրամասները հայտնի չեն, ոստիկանությունը հետաքննություն է սկսել: