Պետդավաճանության մեջ մեղադրվող մայորին հանրային պաշտպան է տրամադրվել

Պետական դավաճանության մեջ մեղադրվող մայոր Գարիկ Մարությանին նախաքննական մարմնի որոշմամբ հանրային պաշտպան կտրամադրվի: Yerkir.am-ի տեղեկություններով՝ ՀՀ փաստաբանների պալատի անդամ Մարինե Ֆարմանյանն առաջիկայում կներգրավվի գործում: Մեր տեղեկություններով՝ ձերբակալված մայորը Արմավիրի մարզի Հայթաղ գյուղից է:

Ավելի վաղ հայտնել էինք, որ ՀՀ Ազգային անվտանգության ծառայության կողմից իրականացված համալիր օպերատիվ-հետախուզական միջոցառումների ընթացքում, ստացված օպերատիվ տվյալների իրացման արդյունքում, 2015թ. դեկտեմբերի 4-ին ձերբակալվել է Հայաստանի Հանրապետության քաղաքացի, Արմավիրի մարզի բնակիչ, պահեստազորի մայոր՝ 38-ամյա Գարիկ Մարությանը:

Ըստ նախաքննական մարմնի՝ Մարությանը, երկար տարիներ զբաղեցնելով ՀՀ ՊՆ տարբեր զորամասերի հետախուզության պետի պաշտոնները, համացանցային սոցիալական կայքերի միջոցով կապ է հաստատել Թուրքիայում գործող ադրբեջանական հատուկ ծառայությունների հետ և վարձատրության դիմաց նրանց փոխանցել ծառայության բերումով իրեն հայտնի դարձած, այդ թվում՝ պետական գաղտնիք պարունակող տվյալներ: Հարուցվել է քրեական գործ Հայաստանի Հանրապետության քրեական օրենսգրքի 299-րդ հոդվածի 1-ին մասի հատկանիշներով և Գ. Մարությանին առաջադրվել է մեղադրանք պետական դավաճանության համար: Կատարվում է նախաքննություն: