Արա Գյուլերը չեղարկել է էրդողանամետ հոլդինգի հետ իր՝ կտակի պայմանագիրը

Պոլսահայ աշխարհահռչակ լուսանկարիչ Արա Գյուլերն իր 70-ամյա ֆոտոարխիվը` հեղինակային իրավունքներով, հանձնել էր թուրքական իշխանություններին մոտ կանգնած «Դողուշ» հոլդինգին:

Ըստ Sabah-ի՝ Գյուլերը չեղարկել է էրդողանամետ հոլդինգի հետ իր պայմանագիրը: Նա ցանկանում է իր անվամբ թանգարան հիմնել և այնտեղ զետեղել իր արխիվը: Նշվում է, որ հենց դա էլ պատճառը, որ նա չեղարկել է նախորդ շաբաթ կնքած պայմանագիրը:

Հիշեցնենք, որ Արա Գյուլերի և հոլդինգի միջև նոյեմբերի 18-ին պայմանագիր էր կնքվել, համաձայն որի՝ աշխարհահռչակ լուսանկարիչը ամսական ստանալու է 50 հազար թուրքական լիրա (մոտ 17 հազար ԱՄՆ դոլար): Բացի այդ` թուրքական հոլդինգին էին անցնելու այն շենքը, որտեղ գտնվում է «Արա» սրճարանն ու  Արա Գյուլերի լուսանկարչական ապարատների հավաքածուն:

Գյուլերի արխիվն ու մյուս միջոցները շահագործելու համար թուրքական հոլդինգը պետք է ստեղծեր հատուկ ընկերություն, որի բաժնետոմսերի 40 տոկոսը կլիներ Արա Գյուլերի սեփականությունը:

Արա Գյուլերի արխիվը գնահատվում է 3 մլն եվրո: