Ես լուսանկարիչ չեմ, ֆոտոլրագրող եմ. Արա Գյուլերը հանդիպել է ուսանողների հետ

Երեկ պոլսահայ ֆոտոլրագրող Արա Գյուլերը հանդիպել է 400 երիտասարդ լրագրողների և լուսանկարիչների հետ:

Ըստ Ermenihaber-ի՝ հանդիպման ընթացքում Գյուլերը ուսանողներին բացատրել է լուսանկարչի և ֆոտոլրագրողի մասնագիտության տարբերությունը:

«Ես ֆոտոլրագրող եմ: Ես իմ տարիներն անցկացրել եմ ֆոտոլրագրության մեջ: Լուսանկարիչը նկարում է այն, ինչ տեսնում է: Այդ լուսանկարը նա պահում է իրեն կամ նվիրում բարեկամին, իսկ ֆոտոլրագրողն իր ժամանակաշրջանը փոխանցում է այլ դարեր: Մենք դա ենք անում»,- ասել է նա:

Դիմելով ուսանողներին՝ Գյուլերը հարց է ուղղել. «Ուրեմն մեզ ի՞նչ են անվանում»: Ի պատասխան, ուսանողներն ասել են՝ ֆոտոլրագրող:

Լուսանկարների 58 գրքի հեղինակ Արա Գյուլերը նշել է նաև, որ ֆոտոլրագրողը պատասխանատու է նաև լուսանկարներն արխիվացնելու համար: