Կառավարությունն արդեն նվազեցրել է տուգանքների չափերը. պատգամավորների առաջարկը մերժվեց

Այսօր կառավարության նիստում կառավարությունը բացասական եզրակացություն տվեց  «Վարչական իրավախախ­տում­ների վերաբերյալ օրենսգրքում փոփոխություններ կատարելու մասին» հարցին:

Օրենսդրական նախաձեռնությունը կառավարությանը ներկայացրել էին  ԱԺ պատգամավորներ Էդմոն Մարուքյանը, Նաիրա Զոհրաբյանը, Վահան Բաբայանը ու Թևան Պողոսյանը: Ներկայացված նախագծով առա­ջարկվում էր հիմնականում կրկնակի չափով կրճատել գործող Վար­չա­կան իրավախախտումների վերաբերյալ օրենսգրքում տեղ գտած` առավել հաճախ հանդիպող և նվազ հասարակական վտանգավորություն ունեցող ճա­նա­պարհատրանսպորտային իրավախախտումների համար նախա­տես­ված տուգանքները:

Արդարադատության նախարար Արփինե Հովհաննիսյանը նշեց, թե նախագծում պատ­շաճ հիմնավորված չէ տու­գանք­ների չափերի նվազեցման անհրաժեշտությունը, և ելնելով շարադրվածից`  կառա­վա­րու­թյունը  դեմ է ներկայացված նախագծի ընդունմանը և օրենսդրա­կան նախաձեռնության հեղինակներին առաջարկում է ներկա փուլում ձեռնպահ մնալ օրենս­­դրա­կան նախաձեռնության քննարկումից:

«Մեկ անգամ կառավարությունը համալիր հետազոտության հիման վրա արդեն կատարել է տուգանքների չափերի նվազեցում, և կարևոր է, թե մեր հաջորդ քայլը որը պետք է լինի»,- ասաց նախարարը` հավելելով, որ նախարարությունը դեռ անում է քայլեր պակաս վտանգավորություն և միտում չունեցող տուգանքների չափերը կրճատելու ուղղությամբ, որ ստեղծվել է աշխատանքային խումբ, որը գործում է այդ հարցով, և մինչև տարեվերջ ԱԺ-ին կներկայացնի նախագիծ, որում լուծում կտրվի այդ հարցերին: