Սերժ Սարգսյանի` լեգիտիմ չլինելու մասին հայտարարություններն օդի մեջ են ու անիմաստ. Աղվան Վարդանյան

ՀՅԴ խմբակցության քարտուղար Աղվան Վարդանյանն այսօր խորհրդարանական ճեպազրույցների ընթացքում անդրադարձավ «Ոչ»-ի ճակատի գործունությանը և հնարավոր հաջողություններին, նշեց, որ որևէ հաջողություն չի կանխատեսում և իրատեսական չի համարում:

«Մենք ամեն ինչ անում ենք, որ հանրաքվեն անցնի իսկապես լավ պայմաններում: Վստահ եմ, որ կարելի է հնարավորինս նորմալ հանրաքվե անցկացնել: Դրանից հետո մեզ սպասվում է հսկայական աշխատանք երկու ուղղությամբ` մեկը Ընտրական օրենսգրքի նոր նախագիծն է, մյուսը` խնդիր դնել առկա իրավիճակում Հայաստանում անել քայլեր, որոնք հանրության մոտ դրական հույս կառաջացնեն: Հսկայական գործ կա անելու, բայց դա պետք է անել աշխատանքով»,- ասաց Վարդանյանը` հավելելով. «Մեր քաղաքացիները շատ լավ տարբերում են չորը թացից: Միակ վտանգը, որ հանկարծ տարբեր տեղական իշխանիկներ չփորձեն ցույց տալ, թե իրենք ամենալավն են, մյուսներն իրենցից վատն են: Հանրաքվեի մասին օրենքը համապատասխան շեմ է սահմանել, և ես կարծում եմ, որ պետք է «այո»-ն ապահովել աշխատանքով` բացատրելով, ապացուցելով, որ սա շանս է մեր երկրի համար»:

Պատասխանելով հարցին, թե Սերժ Սարգսյանն արդյո՞ք եղել է լեգիտիմ նախագահ, պատգամավորը նշեց, որ անցած ընտրություններին իրենք հնչեցրել են գնահատականներ: «Մենք ապրում ենք Սերժ Սարգսյանի նախագահության շրջանում, և բնականաբար, լեգիտիմ, ոչ լեգիտիմ` այս բառերն անտեղի են: Իհարկե, լեգիտիմ է: Ի՞նչ է նշանակում` այս պայմաններում խնդիր դնել` լեգիտիմ է, թե` ոչ: Ի՞նչ է նշանակում խնդիր դնել` իրավունք չունի սահմանադրական փոփոխություններ անել, որովհետև լեգիտիմ չէ: Սրանք օդի մեջ հնչող հայտարարություններ են, անիմաստ կոչեր են: Արհեստական, կեղծ հարց է»:

Վարդանյանը նշեց նաև, որ ժողովուրդը սահմանադրական փոփոխություններ նախաձեռնելու լիազորություն չունի, այն վերապահված է Սերժ Սարգսյանին և խորհրդարանի մեծամասնությունը, սակայն նոր Սահմանադրությունը ընձեռում է նաև այդ հնարավորությունը: