Մենք մանր բիզնեսով զբաղվելու գայթակղություն չունենք. Գագիկ Խաչատրյան

ԱԺ հերթական քառօրյայի նիստում, երբ քննարկվում էր 2016թ. բյուջեի նախագիծը, ԱԺ ընդդիմադիր պատգամավոր Նիկոլ Փաշինյանը հարց ուղղեց հիմնական զեկուցող` ՀՀ ֆինանսներ նախարար Գագիկ Խաչատրյանին: Նա նախ նշեց, որ հնչեցվող հարցը պատվիրակված հարց է, այսինքն` Հայաստանի մի քանի մարզերում տարբեր գործարարներ խնդրել են այդ հարցը տալ: «Ինչպե՞ս է լինում, որ, լինելով ֆինանսների նախարար, Դուք զբաղվում է ՀԴՄ-ների թղթի ներմուծմամբ, արդյո՞ք դա կոռուպցիայի, հովանավորչության կամ խմբակային կառավարման ցայտուն օրինակ չէ»,- հարցրեց պատգամավորը:

Նախարարը պատասխանեց, որ այդ կապակցությամբ իսկապես մամուլի հրապարակումներ են եղել: «Ես կամ իմ ընտանիքը որևէ առնչություն չունենք ՀԴՄ-ների թղթի բիզնեսի հետ: Առաջին էտապում, երբ ՀԴՄ-ների կտրոններն էինք թողարկում, մեր համար կարևոր էր, որ դրանք չկեղծվեն, մենք մրցույթ անցկացրեցինք, և նրանք, ովքեր հաղթեցին այդ մրցույթում, պատահականությամբ էին գրանցված մեր շենքում: Այդ թղթի ներմուծման բիզնեսը մանր բիզնես է, հավատացնում եմ` մենք նման մանր բիզնեսներով զբաղվելու գայթակղություն չունենք»,- ասաց Գագիկ Խաչատրյանը:

Նիկոլ Փաշինյանը արձագանքեց. «Փաստորեն, կռուպնի բիզնեսով եք զբաղվում»: «Գոնե մանր բիզնեսի մեջ մեզ մի մեղադրեք»,- ի պատասխան նշեց նախարարը:

Փաշինյանը հարցրեց. «Ո՞նց եղավ, որ պատահական գրանցվեց այն բնակարանում, որտեղ գրանցված է «Յուքոմ» ընկերությունը, որի առնչությունը Ձեր ընտանիքի հետ գոնե հրապարակայնորեն հաստատված է»: Նախարարը պատասխանեց. «Երիտասարդը, ով զբաղվել է ՀԴՄ կտրոններով, այն երիտասարդն է, ով մրցութային կարգով հաղթել է: Հետագայում նա սկսել է աշխատել էլեկտրոնային համակարգերի ոլորտում, մասնավորապես` «Յուքոմ»-ի հետ»: