Հովիկ Աբրահամյանն այս անգամ բարկացավ Արման Սահակյանի տեղակալի վրա

Կառավարության այսօրվա նիստում Պետական գույքի կառավարման վարչության պետի տեղակալ Աշոտ Մարկոսյանը ներկայացրեց որոշման նախագիծ, որով գույք է ամրակցվում պաշտպանության նախարարությանը: Նա նշեց, որ պաշտպանության նախարարությունը դիմել է ՀՀ կառավարությանն առընթեր պետական գույքի կառավարման վարչություն՝ վարչության տնօրինությանը հանձնված զինվորական ավանների անշարժ գույքը ՀՀ պաշտպանության նախարարությանը հանձնելու խնդրանքով:

Վարչապետ Հովիկ Աբրահամյանը հետաքրքրվեց, թե ի՞նչ գույք է հանձնվելու ՊՆ-ին: Մարկոսյանը պատասխանեց, որ տարածքում կա պահեստ, ճաշարան, բանջարեղենի պահեստ, թեյարան, մարզադաշտ և այլն: Նա հավելեց, որ տարածքը պետական գույքի վարչությանը հանձնվել է 2013 թվականին:

«Բա ինչի՞ եք նոր հետ հանձնում»,- հետաքրքրվեց վարչապետը:

Մարկոսյանը պատասխանեց. «Հիմնականում գնահատման աշխատանքներ էինք իրականացում»:

«Երկու տարի գնահատո՞ւմ էիք, պահեստի ի՞նչը պետք է գնահատեիք, նպատակն ի՞նչն է, մի հատ պարզ բացատրի՝ հասկանամ: Երկու տարի վերցրել եք, եթե պիտի տայիք ՊՆ-ին, ինչի՞ չէիք տալիս»,- բարկացավ Հովիկ Աբրահամյանը: