Ամոթ ա, տենց հարցեր չարժե տալ. Բելաջոյի Գրիշը բարկացավ

ԱԺ ԲՀԿ խմբակցության պատգամավոր Գրիգորի Մարգարյանի (Բելաջոյի Գրիշ) պահվածքի մասին մեկ անգամ չէ, որ գրել ենք: Սույն պատգամավորը, որ թեեւ անկուսակցական է, բայց մի ոտքով ՀՀԿ-ում է, մյուսով՝ ԲՀԿ-ում, այս օրերին, երբ ԲՀԿ-ն քննադատում է իշխանությունների արածները, հայտնվել է, մեղմ ասած, ոչ նախանձելի վիճակում:

Նրան, օրինակ, դուր չեկավ մեր լրագրողի հարցը, թե` հնարավո՞ր է ինքն էլ է մտադիր առաջիկայում վայր դնել իր պատգամավորական մանդատը կամ դուրս գալ ԱԺ ԲՀԿ խմբակցությունից: Ներքաղաքական նոր իրավիճակի հետ կապված` մամուլը անհավանական չի համարում ԲՀԿ խմբակցությունում գտնվող գործարար հատվածի դժգոհությունները ԲՀԿ քաղաքականությունից եւ, ըստ այդմ, հեռացումը խմբակցությունից:

ԲՀԿ խմբակցության այս պատգամավորը համարում է, որ լրատվամիջոցները պարապ են մնացել, շոու են սարքում, հետո` գնում այդ շոուի հետքերով: «Ամոթ ա, տենց հարցեր չարժե տալ, պարապ ե՞ք մնացել, ժողովո'ւրդ: Իհարկե` ոչ, ինչի՞ պետք ա դուրս գամ: Դավիթ Քոչարյանը պատճառ ունի, դուրս ա գալիս ԲՀԿ խմբակցությունից»,- բարկացած հայտարարեց պատգամավորը:

Մեր դիտարկմանը, որ հարցի մեջ որևէ ամոթալի բան չկա, նոր քաղաքական իրավիճակ է ստեղծվել, պատգամավորը զարմացած պատասխանեց. «Ի՞նչ գործընթացներ են որ, ի՞նչ թեմա ա եղել որ»: Նշեցինք, որ խոսքը նոր վարչապետի, նոր կառավարության և ԲՀԿ-ի` կոալիցիա չմտնելու արդյունքում ԲՀԿ գործարար հատվածի դժգոհությունների մասին է: Գրիգոր Մարգարյանը պատասխանեց. «ԲՀԿ-ից դուրս գալու որևէ նման հարց չկա, վարչապետ էր, փոխվեց»:

Խոսելով նոր վարչապետի նշանակման մասին` արդեն հանգիստ, պատգամավորը նշեց, որ շատ լավ կարծիք ունի Հովիկ Աբրահամյանի մասին. «Ես չեմ պատկերացնում, որ, բացի Աբրահամյան Հովիկից, էլ ով կարող էր այդ պաշտոնը զբաղեցնել: Վստահ եմ, որ նա կկարողանա դրական փոփոխություններ կատարել»: