Գործող Սահմանադրությունն այնքան վատն է, որ «ոչ» ասելու ռեալ հիմքեր ես չունեմ. Արշակ Սադոյան

Հանրային խորհրդի անդամ Արշակ Սադոյանի խոսքով` մեր Սահմանադրությունը փոխելու հրատապ անհրաժեշտություն կա: Նա այսօր լրագրողներին ասաց, որ գործող Սահմանադրությունն այնքան վատն է, որ «ոչ» ասելու ռեալ հիմքեր ինքըս չունի:

«Ավելի լավ է «այո» ասել սահմանադրական փոփոխություններին: Ընդհանուր առմամբ, ինչ առաջարկվում է, ընդունելի է, սակայն, ցավոք, սահմանադրական բարեփոխումների անվան տակ հաճախ չարափոխություններ են կատարվում: Կոնկրետ սահմանադրական այս փոփոխություններում չեն ներառվել Հանրային խորհրդի մի շարք առաջարկություններ»,- շեշտեց նա:

Սադոյանի խոսքով` Սահմանադրության փոփոխված տարբերակում չկա այն լիազոր անհատը, ով կարող է կրել պատասխանատվություն երկրի համար: «Իր նախընտրական խոստումները չկատարելու համար որևէ մեկին պատասխանատվության չեն ենթարկի, մինչդեռ՝ նախագահը պետք է լինի արբիտր, հսկող անձ»,- ասաց Սադոյանը:

Նա նաև նշեց, որ Ռոբերտ Քոչարյանը, Գագիկ Ծառուկյանը, նույնիսկ Պարույր Հայրիկյանը միշտ երազել են դառնալ թագավոր, առաջին դեմք, և խորհրդարանական կառավարման համակարգի ներդրումը շատերի երազանքները հօդս է ցնդեցնում: