Որդան կարմիրի պահպանման խնդիրը` դպրոցականների ուշադրության կենտրոնում

«Որդան կարմիր» պետական արգելավայրի մոտակայքում գտնվող` Արմավիրի մարզի հինգ համայնքների հանրակրթական դպրոցներում երեկվանից մեկնարկել են որդան կարմիրի պահպանությանն ուղղված էկոդասընթացները:

Ծրագրի հեղինակ եւ դասընթացավար Գալուստ Նանյանը yerkir.am-ին հայտնեց, որ  ընտրվել են  «Որդան կարմիր» պետական արգելավայրի վրա ազդեցություն ունեցող համայնքներից հինգը` Արմավիրի մարզի Ջրառատի, Արազափի, Եղեգնուտի, Երասխահունի եւ Արգավանդի դպրոցները, որպեսզի բարձր դասարանցիները տեղյակ լինեն արգելավայրի խնդիրներին եւ միջոցառումներ իրականացնեն այդ տարածքում բազմացող միջատի պահպանության ուղղությամբ:

Դասընթացներն իրականացվում են ակտիվ ուսուցման մեթոդներով, տեսական փուլից հետո դրանք կշարունակվեն գործնական ձեւաչափով:

Ջրառատի եւ Երասխահունի միջնակարգ դպրոցներում արդեն անցկացվել է վերը նշված ծրագիրը: Ի դեպ, ըստ Նանյանի, աշակերտները բավականին ակտիվ են եղել, օրինակ` Ջրառատի դպրոցականները բարձրացրել են գոմաղբի ոչ ճիշտ կառավարման եւ գյուղամիջյան կենտրոնական փողոցի անմխիթար վիճակի հարցերը եւ պնդել, որ դա մեծ վնաս է հասցնում գյուղին եւ մարդկանց առողջությանը:  Նաեւ առանձնացվել է պոլիէթիլենային տարաների խնդիրը:

«Երասխահունում դասընթացի մասնակիցներն իրենց մտահոգությունը հայտնեցին, որ գյուղում  ավելացել է ավազահանքերի շահագործումը: Առաջ քաշեցին նաեւ աղբի խնդիրը»,- նշեց Գ. Նանյանը:

Նա նաեւ հայտնեց, որ դասընթացի ընթացքում անդրադարձ է կատարվում Արմավիրի մարզի էկոլոգիական խնդիրներին, եւ ինտերակտիվ քննարկումների ընթացքում երեխաները տալիս են խնդիրների լուծման` իրենց բանալիները:

Դասընթացների ավարտից հետո դասընթացավարը յուրաքանչյուր դպրոցից կընտրի առնվազն 5 աշակերտի, որպեսզի իրականացվի գործնական աշխատանքների փուլը` այցելություն «Որդան կարմիր» արգելավայր`  տեղում ծանոթանալու արգելավայրի ռեժիմին եւ այնտեղ պահպանվող  բուսական ու կենդանական աշխարհին: Իսկ լավագույն մասնակիցները կայցելեն նաև Բնության պետական թանգարան,  Կենդանաբանության թանգարան եւ Երկրաբանության պետական թանգարան, կլինեն նախապես ընտրված` բնության պահպանվող տարածքներից մեկում: