Տղաներին ասել եմ, որ պետք է պահել խաղային կարգապահությունը. Սարգիս Հովսեփյան

Սեպտեմբերի 7-ին Ֆրանսիայի Նիս քաղաքի «Ալյանս Ռիվիերա» մարզադաշտի մամուլի ասուլիսների սրահում տեղի ունեցավ Հայաստանի ազգային հավաքականի գլխավոր մարզչի ժամանակավոր պաշտոնակատար Սարգիս Հովսեփյանի նախախաղային մամուլի ասուլիսը, որի ընթացքում նա պատասխանեց լրագրողների հարցերին:  

Արդյոք դիտե՞լ եք Ֆրանսիայի հետ նախորդ խաղը, ի՞նչ տպավորություններ ունեք, ինչի՞ վրա է պետք աշխատել:

- Իհարկե, դիտել եմ, հոյակապ հավաքական է, որակյալ ֆուտբոլիստներ, արագ ֆուտբոլ են խաղում: Այդպիսի հավաքականների դեմ պետք է խաղալ կարգապահ ֆուտբոլ, 90 րոպե, հակառակ դեպքում այդ կարգի հավաքականները միշտ պատժում են: Այդ պատճառով տղաներին ասել եմ, որ պետք է պահել խաղային կարգապահությունը և առավելագույն նվիրվածությամբ խաղալ, քանի որ մենք հասկանում ենք՝ ով է մեր հակառակորդը: Եթե, ինչ-որ մեկը այլ կերպ մտածի, շատ դժվար կլինի մեր հավաքականի համար: 

Ի՞նչ փոփոխություններ կա Հայաստանի հավաքականի կազմում համեմատած անցյալ տարի Ֆրանսիայի հավաքականի հետ խաղի:

- Փոփոխությունները շատ չեն, քանի որ Հայաստանի հավաքականը չունի ֆուտբոլիստների այդպիսի լայն շրջանակ, ինչպիսին ունի Ֆրանսիայի հավաքականը: Մարտավարության մեջ ենք փոփոխություն արել: Չնայած պարտվեցինք Պորտուգալիային, բայց կար ֆուտբոլ, կային գոլեր, սխալների պատճառով պարտվեցինք: Խաղացինք Դանիայի հետ, տղաները վստահ խաղացին, կարող էինք հաղթել: Չստացվեց հաղթել, սակայն ես տեսա թիմ, տղաները հավատում են իրենց ուժերին, առանց որի արդյունքի չես հասնի: Շատ քիչ փոփոխություններ ենք արել, քանի որ նորից ասեմ, ընտրությունը մեծ չէ: 

Հավաքական հրավիրվող ֆուտբոլիստների կազմի շուրջ միշտ խոսակցությունները շատ են, ո՞վ է Ձեզ խորհուրդ տալիս կազմի ընտրության հարցում և ի՞նչ կարծիք ունեք այն մասին, որ ներքին առաջնության ակումբներից հավաքական մեծամասամբ հրավիրվում են «Փյունիկի» ֆուտբոլիստները:

- Ինչ վերաբերվում է խորհուրդներին, ապա ազգային հավաքականի մարզչական շտաբը ներկայացնում է թեկնածուներին, քննարկում ենք, կարծիքներ լսում, բայց պարզ է, որ վերջնական որոշումը ես եմ կայացնում: Կազմի վերաբերյալ դժգոհություններ միշտ էլ լինում են և ցանկացած կազմի դեպքում կլինի դժգոհող կողմ:

 Ինչ վերաբերվում է «Փյունիկից» շատ ֆուտբոլիստներ հրավիրելուն: Ես շատ կուզենայի, որ մյուս ակումբներում լինեին լավ երիտասարդ ֆուտբոլիստներ: Ես այժմ գտնում եմ, որ ուժեղագույնները խաղում են «Փյունիկում»: Շատ լավ կլիներ, որ այլ ակումբներում առաջին դերերում լինեին հայ ֆուտբոլիստներ, բայց միայն լեգեոներներին եմ տեսնում: Իհարկե, դա ակումբի գործն է, բայց միևնույն ժամանակ դա դժվարացնում է ազգային հավաքականի մարզչի գործը, քանի որ ընտրություն չկա: 

Ինչո՞ւ Գեղամ Կադիմյանը չի արժանացել Ձեր ուշադրությանը, հաշվի առնելով այն, որ վերջին շրջանում լավ է խաղում:

- Կադիմյանի խաղը մենք տեսել ենք, լավ ֆուտբոլիստ է, գիտենք, որ նա համաձայնվել է հանդես գալ Հայաստանի համար: Աշխատանքները տարվում են, որպեսզի Կադիմյանին հրավիրենք ընկերական խաղի, որ տեսնենք թե ինչպես իրեն կդրսևորի ազգային հավաքականների հանդիպումների մակարդակով:

Եթե նայեք ազգային առաջնության աղյուսակը կտեսնք, որ «Փյունիկը»  բոլորից շատ է գոլ խփել և բոլորից քիչ բաց թողել: Դա նույնպես խոսում է ֆուտբոլիստների մակարդակի մասին: 

Դանիայի հետ խաղից հետո Դուք ասեցիք որ երկրորդ հենակետայինի խնդիր կա: Ռումյան Հովսեփյանը հիմա լա՞վ մարզավիճակում է, ի՞նչ կասեք այդ մասին:

- Հովսեփյանը լավ ֆուտբոլիստ է: Այժմ մեզ պետք է հենակետային կիսապաշտպան, ով լավ պաշտպանվում է և կանխում է հակառակորդի գրոհները, քան կառուցողական ոճի հենակետային: Ցավոք, այժմ Ռումյանը չի կարող այդ խնդիրները լուծել: Այն ֆուտբոլիստները, ովքեր ընդգրկված են Հայաստանի հավաքականի կազմում կարող են կատարել այդ խնդիրը, եթե ոչ, ապա կհրավիրվի Ռումյանը և նաև այլ ֆուտբոլիստներ, ովքեր հստակ կկատարեն մարզչի առաջադրանքը:

 Ալբանիայի հետ հանդիպումից հետո, Դուք ժամանակավորապես գլխավորեցիք հավաքականը: Արդյոք դուք պատրա՞ստ եք շարունակել ձեր աշխատանքը հավաքականի հետ:

Ես չէի ցանկանա գնահատական տալ իմ աշխատանքի վերաբերյալ: Գնահատականն իմ աշխատանքի համար տալիս է ՀՖՖ նախագահը: Ես անում այն, ինչ կարող եմ անել և օգտակար լինել մեր հավաքականին: Մնացել է ընդամենը երկու խաղ և գնահատական կլինի, բավարար կամ անբավարար:

ՀՖՖ պաշտոնական կայք