Թուրքիայում հայերից խլված գերեզմանատան տարածքի փոխարեն 37 մլն դոլար փոխհատուցում կտրամադրեն

Կ.Պոլսի Շիշլի շրջանում գտվող հայկական կաթոլիկ Սուրբ Հակոբ հիվանդանոցի հիմնադրամին պականող 41 հզ. 430 քմ գերեզմանատան տարածքը 1930 թվականին դատարանի որոշմամբ տրվել է Պոլսի քաղաքապետարանին:

Ինչպես տեղեկացնում է թուրքական Hurriyet-ը, Սուրբ Հակոբ հիվանդանոցի հիմնադրամին պատկանող տարածքը 1936 թվականին եղել է կաթոլիկների գերեզմանատուն, իսկ 1971 թվականի մարտի 12-ին հանրային սեփականություն է դարձել։

Այն վերադարձնելու համար հիմնադրամների ընդհանուր տնօրինությունը 2012 թվականին դիմել էր հիմնադրամների մեջլիս, որից հետո գերեզմանատան սեփականությունը գրանցվել էր հիմնադրամի անունով:

Հայկական կաթոլիկ Սուրբ Հակոբ հիվանդանոցի հիմնադրամն այն վերադարձնելու պահանջով դիմել է դատարան, որն էլ վճռել է, որ հիմնադրամին 111 մլն 850 հազար թուրքական լիրա (ավելի քան 37 մլն դոլար) փոխհատուցում պետք է տրամադրվի:

Նշենք, որ նախկին գերեզմանատան տարածքում առևտրի կենտրոններ և գետնանցումներ են կառուցվել։