Լուրջ չէ այն թեզը, թե իբր սահմանադրական փոփոխություններն արվում են իշխանության վերարտադրության համար. Լյուդմիլա Սարգսյան

ԱԺ ՀԱԿ խմբակցության անդամ, վերակազմյալ ՍԴՀԿ-ի ղեկավար Լյուդմիլա Սարգսյանը երեկ կողմ է քվեարկել սահմանադրական փոփոխությունների նախագծին: Հիշեցնենք, որ ՀԱԿ-ի մյուս պատգամավորները դեմ են քվեարկել:

Yerkir.am-ի հետ զրույցում Լյուդմիլա Սարգսյանը, մեկնաբանելով իր դիրքորոշումը, ասաց, որ սահմանադրական փոփոխությունների նախագծում կան մի քանի դրույթներ, որոնք վերակազմյալ ՍԴՀԿ-ին բերել են այն դիրքորոշմանը, որ նոր Սահմանադրությունը լինելու է ավելի առաջադիմական, քան գործողը:

«Թեկուզ այն, որ իշխանության տարանջատում է տեղի ունենալու, թեկուզ այն, որ համամասնական ընտրակարգ է լինելու: Ճիշտ է` սահմանադրական փոփոխություններով միանգամից թերությունները չեն լուծվելու, բայց համարում եմ, որ գործող Սահմանադրությունը հնարավորություն է տվել իշխանությանը վերարտադրվելու: Հետևաբար, ես լուրջ չեմ ընդունում այն թեզը, թե սահմանադրական փոփոխություններն արվում են իշխանության վերարտադրության համար»,- ասաց Լյուդմիլա Սարգսյանը:

Նա շեշտեց, որ իր քվեարկությունը եղել է վերակազմյալ ՍԴՀԿ ատենապետի տեսակետը, որին կուսակցությունն է լիազորել կողմ քվեարկել, դա չի եղել ՀԱԿ խմբակցության անդամի քվեարկություն:

«Եթե մենք մշտապես պայքարել ենք, որ մեծամասնական ընտրակարգը հանվի, ու համամասնականը մտցվի, ուրեմն տրամաբանական չեմ համարում, որ պայքարենք բոլոր այն դրական բաների դեմ, որոնք այսօր ներկայացվում են: Ճիշտ է` խութեր ու խորամանկություններ էլ կլինեն այդ նախագծում, բայց մեծ հաշվով սա ապագային միտված Սահմանադրություն է»,- ասաց պատգամավորը:

Նշենք, որ Լյուդմիլա Սարգսյանի կողմ քվեարկությունից հետո ՀԱԿ-ը սկսեց նրան սուր քննադատության ենթարկել:

Մեր հարցին, թե ի՞նչ ունի պատասխանելու այդ քննադատություններին, նա պատասխանեց. «Ներողամտաբար եմ վերաբերվում, շատ մեծ ցավ չեմ ապրում, բայց ցավում եմ, որ ճիշտ չեն ընկալում քաղաքական մեր մոտեցումը: Բայց ինչ արած, քաղաքականությունն այնպիսի բան է, որ դու չես կարող քո մոտեցումներով բոլորին գոհացնել: Դա մեր կուսակցության դիրքորոշումն էր, մենք դա արտահայտել ենք: Հիմա ում դա կգոհացնի, ում` ոչ, դա արդեն այդ մարդկանց խնդիրն է»,- ասաց Լյուդմիլա Սարգսյանը: