Երջանիկ կլինեի, եթե գլխավորեի Հայաստանի հավաքականը. Յուրի Ջորկաեֆ

Այսօր «Փյունիկ» մարզադաշտում տեղի ունեցավ բարեգործական հանդիպում «Ակբա Կրեդիտ Ագրիգոլ» բանկի և Հայաստանի լրագրողների հավաքականի միջև, որին մասնակցում էին աշխարհահռչակ ֆրանսահայ ֆուտբոլիստ Յուրի Ջորկաեֆն ու Հայաստանի հավաքականի նախկին գլխավոր մարզիչ Վարդան Մինասյանը: Հանդիպումից հետո Ջորկաեֆը զրուցեց լրագրողների հետ:  

«Ես շատ հաճախ եմ   կազմակերպում  նման բարեգործական միջոցառումներ և ուրախ եմ, որ մշտապես կարողանուոմ են օգնել   կարիքավոր մարդկանց: Յուրաքանչյուր տարի Նյու-Յորքում նման միջոցառումներ ենք կազմակերպում:Հայաստան ժամանելուն պես ես ինձ հիանալի եմ զգում: Հաճելի է,  երբ տեսնում եմ թե որքան են ինձ այստեղ սիրում: Այստեղ ամեն ինչ հիանալի է»,-ասաց անվանի ֆուտբոլիստը:

Լրագրողներից մեկի այն  հարցին, թե կցանկանար Յուրի Ջորկաեֆը գլխավորել Հայաստանի ազգային հավաքականը, ֆրանսահայ ֆուտբոլիստը պատասխանեց. «Գիտեի որ այդ հարցը տալու եք: Դա իմ ձեռքերում չէ, բայց ինձ համար շատ հաճելի կլիներ: Հայաստանն իմ նախնիների հայրենիքն է: Երջանիկ կլինեի, եթե գլխավորեի Հայաստանի հավաքականը»:

Հավելենք, որ  ֆուտբոլային հանդիպումն ավարտվեց 1:1 հաշվով, իսկ հանդիպման ողջ հասույթը կուղղվի սահմանամերձ Խաչիկ գյուղի դպրոցի և Գավառ քաղաքի մանկատան սաների համար մարզական հանդերձանքի ձեռքբերմանը: